Corpus Van Reenen-Mulder (CRM14): Oorkonde F590r38601

Allen luden die desen breef zoelen zien oft hoeren lesen doe wij ghemeyne Stellinghe van stellincwerf verstaen / dat wij mit Eersamen wisen bescheyden luden Scepen en_ Raed der stat van Campen en_ mit oeren burgheren in rechter vrienscap vergaddert sin / vijf jare lanc naest volghende na datam des briefs in desen vorwaerden die hijr na bescreuen staen / als waert sake dat die bisscop van vtrecht of yema_t van sinen ondersaten die Stat van Campen of oere burgher vercorten wolde an oeren rechte / oft sie mit onbescheyde ouer~vallen wolde / dat soelen sie ons te weten doen en_ als sie ons dat te weten ghedaen hebben soe sole wij sie verantwerden en_ daer vmme arbeyden mit den besten dat wij moghen an den bisscop van vtrecht oft an sine ondersaten daer des te doene is dat wij sie to bescheyde helpen of wij konnen / en_ weert sake dat wij sie tot ghienen bescheyde noch ghescheyde helpen en moghen en_ dat tot orloghe ofte tot ? quame / soe sole wy en_ al de ghene die mit ons verbo_de_ sin ghuede sitters daer toe wesen / en_ hem en ghien arch daer in toe~keren / meer dat beste dat wy moghen / nochtan solen sie en_ oere burghers en_ oer coeplude / en_ al oer ghuet dat binnen onsen lande coemt / of binnen dien landen die mit ons verbonden sin . daer~binnen velich wesen / beholdelic elcker~malc sijns rechtes / al arghelist en_ nye vonde hijr in vytgeseghet In oerconde der waerheit aller vorwaerden vors_ soe heb wy desen brief beseghelt mit onses landes jngheseghele Gheg_ jnt iaer ons h_en dusent drie + hondert Ses + en_ + tachtentich des Ses + en_ + twintichsten daghes in den ?