Corpus Van Reenen-Mulder (CRM14): Oorkonde F590r39502

Jc Egbert hake van + den Rutenb_ge in + der tijt Sculte toe vollenhoe doe kont en_ kenlic allen luden mit dezen openen brieue dat voer my gecomen is int tgherichte in enen gehegeden heymale . daer ic toe gerichte sat toe vollenhoe in + der banck Mathyas goede gellinges zoen priester en_ Cureyt van kuynre en_ heeft daer voer hem en_ voer sine erfg_ erflic en_ ewelic vertegen mit gueden berade en_ sinen vrien moetwille . een stucke erues dat gelegen is in + den ham mit tynse mit Rente en_ mit allen sinen rechte . alset hem toebehoerde . daer an + der noerder~side alre~naest gheeruet is Claes bitteren zone . en_ an + der zuder~side . wolter ploech en_ herman reuels zoene Jn + den seluen gerichte heeft mathias vorscr_ voer hem en_ sine erfg_ dat vorscr_ erue mit allen sinen toebehoren als dat gelegen is op~gedragen Gheert van wilshem ende herman gleuicken . tot behoef der memorien in onser vrouwen kerke te campen . daer men dat vorscr_ erue in die ere godes bruke_ en_ hebben sal . en_ mathyas vorscr_ en_ sine erfg_ daer niet meer an te wachten en heeft . en_ der voscreuen memorie in onser vrouwen kerke te campen mit ordel en_ mit rechte vast gebleuen is Al ergelist en_ nye + vonde hier in vytgeseget Hier waren ouer en_ an alze kornoten daer dit gesciede . Boldewen van + der eze Wolter ymmen zoen Coenraet de witte en_ anders vele gueder lude genoech Jn orkonde der waerheyt want ic egbert hake vorscr_ hier ouer gestaen hebbe alze een Richter soe heb ic om bede wille mijn zegel an dezen brief gehangen Gegeuen jnt jaer ons heren duzent drie + hondert vijf + en_ + tnegentich des dinxedages nae elf + duzent mageden dach .