Corpus Van Reenen-Mulder (CRM14): Oorkonde F596r37502

Wij . . Scepen ende Raet en_ ghemene borghers dier Stat van . . Deuenter doen kond allen luden ende betughen openbaer in dessen opene_ brieue dat wij eenparlic ouerdraghen sijn mi dien Eersame_ luden Scepen ende Raden ende ghemene borghere_ dier Steden van . . Campen en_ van . . Zwolle aller punte_ ende vorwarden die hier nae uolghen ende sekere_ en_ loeuen an goeden trouwen drie jaer lang nae date_ dess_ briefs die stede ende vast te + holden . ende niet te + breken enighes zinnes Jnt + ijrst dat wij tot hem gansen vollencome_ gheloeue_ zullen hebb_ . als onse voervaeren ghehadt hebbe_ . Voertmeer weer yemant die gheweldelike zaken dede in dien lande van zallant . te water ofte te lande oft op dier zuderzee . soe wie daer ijrst bij komen konde . van ons oft van hem / die zolde daer ouer richten sonder vertreck . ende soe wes daer af queme / dat zullen sij mit ons + / ende wij mit hem ghelike vytddraghen . Voertmeer weer yemant die der stede enich ontseghede oft vyant worde . oft ouerlast dede + . onontseghet dat zulle wij mit dier stat dier niet + ontseghet en is ende negheen ouerlast ghedaenen is / veruolghen an dien ghenen . die die ontsegginghe ghedaen hadde_ . ofte die ouerlast onontseghet / en_ weert dat hi niet rechts en_ bescheyds bij dier Stat en_ bij ons . bliue_ en wolde_ / soe zal die Stat en_ wij / dier vorscr_ stat hulper werden . binne_ eenre maent op dier stat ende onses selues ghewin en_ verlies / Voertmeer soe en zulle wij dier twier Stede vyande in onse stat bute_ oren consente niet veylighe_ Voertmeer soe en zulle_ wij dier andere_ stede vyande niet holden oft huysen . oft behulpelic wesen in gheenrehande zake_ die he_ te staden moghen come_ . en_ dien voerscr_ Steden onstade doen moghen Voertmeer weert sake . dat enighe lude quame_ in onse stat die dier and_e Stede vors_ enich vyande were_ ende die Stat of yemant van hore weghe_ . wolde claghen / daer zolde men ouer richte_ onuertrect Voertmeer soe en zulle_ wij noch . zoene_ noch vrede_ butendien andere_ tween steden vorscr_ . sie en hebbe_ + mit ons enen eenparlike_ vrede oft zoene Voertmeer soe segghe_ wij vyt in alle desen vorscr_ punte_ den Greuen van hollant ende sine ondersaten . Voertmeer weert sake dat wij of enich van + den andere_ tween steden vorscr_ tot enigher tijd . sonderlinghen wille oft hardicheyt hebben wolden . in enighen punte_ vorscr_ / soe wes dan die twe va_ ons . oft van den andere_ tween steden vorscr_ daer van ouerdroeghen / des zolde die derde stat volghen . also dattet daer mede doer solde gaen . Voertmeer weert sake . dat wij ofte die twe stede vorscr_ voerbede hadde_ en_ ons mit dier vorscr_ steden een / ofte dien tween steden vorscr_ wedervore dat die stat bescheyt mochte hebbe_ . bij dien tween steden . dat mochte_ sij dan zoene_ oft vreden / des zolde_ wij oft die derde stat die die voerbede hadde volghen + . Vytgheseghet h_en herberts va_ putten lijf + . ende sloten . Voertmeer alle saken die van desen pvnte_ en_ vorwarden come_ moghen . zullen wij mit dien tween Steden . en_ die twe Stede mit ons ghelike vytdraghen Al arghelist en_ quade behendicheyt in alle desen pu_ten en_ vorwaerde_ vorscr_ claerlike vytgheseghet Jn kennisse der waerheyt en_ om vestnisse aller dinghe_ vorscr_ op~dat sij Stede en_ vast bliue_ als vorscr_ is soe hebben wij onser Stad seghel an desen brief doen hanghen Gegheue_ jnt jaer ons heren dusent drie + hondert Vijf en_ Tseuentich op sente Jacobs dach eens heylighe_ apostels . . -