Corpus Van Reenen-Mulder (CRM14): Oorkonde F596r37601

Wij ghemeyne Scepene ende Raed der Stat van zwolle / maken kont allen luden dat wij eens eerzamen vaders in gode heren Arnds van h˚ern . . Bisscops Tutrecht ons liefs heren amptman ende Rentemeyster van zalland ende Castelleyn des huus tot vollenho ende ten Arkelsteyne die n˚ ziin oft hier namaels wesen zullen gheloeft hebben ende ghelouen in goeden trouwen oft zake weer dat hem enich last queme van ons liefs heren van vtrecht vorscr_ nacomelingen Bisscopen Tutrecht om~dat zij hem die slote ende ampte niet ouergheuen noch leueren en wouden tot horen wille om des verbondes wille dat sij ende wij malc anderen gheloeft hebben r˚erende van + den vijf + dusent ouden schilden / daer sij ende wij wouter van voerst of voldaen hebben dien last zullen wij den vors_ amptluden ende Castelleyn die n˚ ziin of namaels wesen zullen helpen wtdraghen met alle onsen vermoghen zonder enigherhande wederzecgen Ende oec en zullen wij ons liefs heren nacomelinge vorscr_ niet hulden noch zweren den vorscr_ amptluden ende Castelleyn en ziin brieue ghegheuen ofte hem en zij anders voldaen daer sij mede bewaert moghen wesen zonder enigherhande arghelist Jn orkonde des briefs beseghelt mit onsen zeghel . . Ghegheuen int Jaer ons heren Dusent Drie + hondert zes ende tseuentich op Sente Thomas dach . .