Corpus Van Reenen-Mulder (CRM14): Oorkonde F596r39501

JC henric van den laer . Engelberts soen van zalne . bekenne . want die selue Engelbert miin vader ende Jutte van den laer miin moeder . voer hem en_ voer hoer erfghenamen . verliket ende verscheiden siin . van den huze ten lare / en_ van alre schelinghen . ansprake ende ghebreke . die sij vpten eerweerdighen in goede . seligher ghedechtnisse . hern florens van weuelinchauen . wilneer bisschop Tutrecht . sinen steden . Deuenter Campen ende zwolle . lande en_ luden onder~een hadden / also dat miin vader ende moeder vors_ / noch hoer kind_e ende erfghenamen . daer af gheen ansprake / meer en solden doen / noch hebben / gelijc dat die breef ynholdt . dien miin vader ende miin moeder vorg_ daer + vp ghegheuen ende beseghelt hebben . als dat Jc hebbe geloeft en_ ghezekert . loeue ende zeker in goeden trouwen . in desen openen breue / dat ic ende myne erfghename_ die vorg_ verlikinghe . ende dat gescheit . en_ alle punten . die die vors_ breef begrijpt . vast stede ende onuerbreecklich soelen holden tot ewighen daghen jn allen manieren / als miin vader ende miin moeder vorg_ . die in den vors_ breef . gheloeft ende bezerghelt hebben sonder arghelist . Ende hebbe des te orkonde minen seghel an desen breef ghehanghen Gegeuen toe deuent_ int iaer ons heren dusent drie + hondert vyue + en_ + tneghentich . des zesten daghes in meye