Corpus Van Reenen-Mulder (CRM14): Oorkonde F679r32601

JN Den Name vns heren . amen . . . Wi . . Ricolt bi . Godes ghenaden . . . Prouest to Sutfenne / Doen Cv˚nt alle den Genen . Di desen tyeghenwardeghe_ brijf Solen Sijn / of hore_ Leesen . en_ Orcu_den . truelike / en_ openbare / Dat ? ? Sint Ghecome_ her johan here van bilant / ridder / Ende ver + kathrina Sijn wijf / en_ beddeghenoet vrowe van bilant Ende becanden openbare dat Se di drideil van der grv˚t te Sutfenne Ghelegen . als di helfte di de zelue her johan hijlt van vns . Ende dat vijrdeil dat de ghnomde h_e van bilant van den h_en van keppele hijlt / to Sutfenschen regthe . to enen pvnde / vercoft hebben der Stat van Sutfenne . erflike / Ewelike / en_ vmm_meir / Waer bi ? vornomde her johan vns vrilike heft vpghedrage_ en_ vpghelate_ jn vnse hant / di vorgheseghde helfte van der grv˚t / di hi van vns hijlt to behuef der Stat van Sutfenne / + vorghenomd Ende becande voert vor vns / dat hi dat vornomde vijrdeil van der seluer grv˚t / dat hi van den h_en van keppele hijlt / hem / vrilike heft vpghedragen tor vorghenomder Stat behv˚ef / Ende want di zelue h_e van keppele dat vijrdeil / dat di h_e van bilant van vm hijlt / van vns voert hijlt / metten vijrden vijrdele van der vorghenomden grv˚t Daer bi her wolter h_e van keppele vor vns quam / en_ drogh vp in vnse hant Dat vorghenomde vijrdeil dat di h_e van bilant van vm hijlt en_ hem heft vrilike vpghedrage_ / to behv˚ef der Stat van Sutfenne / + vorghenomd Ende want dese vorscreuene Stucke_ bi vnser hant / en_ bi onsen willen Sint gheseijt / en_ bi wille / en_ bi vntheuenesse / Des . . Dekens / en_ vns ghemenes Capetels van Sutfenne / Dar vmme hebbe wi . . Ricolt . prouest to Sutfenne vorseght vm beede wille her johans h_e van bilant / en_ her wolters here van keppele vornomt / di vornomde drideil van der grv˚t to Sutfenne ghelege_ / met al hore (-) + lagt_ N?t Gelijsse h_en vranken Sone bekint en_ ghedaen / to Sutfenschen reghte / to ver~herwadene met ene_ pvnde / to der Stat behv˚ef van Sutfenne / Ende waneir dat god ghevoget dat di vornomde Gelijs niet Lancher en is . So Sole wi / of vnse nakomelinck / de vornomde drideil / van der vorghenomd_ grv˚t / ene_ Scepene / of ene_ rades man van Sutfenne belene_ den vns / of vnsen Nakomelinche / de Stat van Sutfenne wijst / en_ gift / jn der manire di vorscreue_ Staet Ende aldus Sal di Stat van Sutfenne / de ghenomde drideil van der vorghenomd_ grv˚t / van vns / en_ van vnsen Nakomelinchen hoelde_ / Erflike / Ewelike / en_ vmmermeir / Hijr hebben an / en_ auer gheweist / herman van vtregt johan van drynen . Lambreght Meyerinck . Maes van Escede . en_ Didric van bronsberghe / vnse manne / her vrederic van der Ese / her harman van Stynre Ridd_e Didric van keppele henric van wische borghart van haelt / en_ johan van krene / en_ anders vele gv˚der Lude / Ende dat dese Stucken Steede bliue_ en_ vast / So hebbe wi Ricolt . . P_vest van Sutfenne vorghseght an desen brijf vnse Segel doen hanchen . Met Segelen / vns Capetels van Sutfenne / her johans van bilant en_ h_en wolters here_ van keppele vorgheseght / Ende wi / deken . en_ ghemene Capetel van Sutfenne / kenne_ / en_ Orcu_de_ met desen briue / Dat dese vorscreuene Stucken . algader wair Sint / en_ ghescijt bi vnsen willen / jn Orcu_de vns . . Capetels Segel / anne desen brijf ghehanchen . met Segele_ vns prouestes en_ der andere vornomd_ h_en . . Ende wi johan here van bilant Ende wolt_ here van keppele / + vorghenomd kenne_ en_ Orcu_de_ jn desen briue Dat al dese vorghescreuene Stucke_ waer Sint En_ hebben vmme de meere vestnesse dese_ tyeghenw_dighen brijf / med vnsen Segelen beSegelt met den . . proueste . . en_ . . . Capetele vorn_ . . Ghegheue_ jnt jaer vns h_en . Dusent Dri + hvndert ses ende tvyntigh vp Svnt Mathijs dagh -