Corpus Van Reenen-Mulder (CRM14): Oorkonde F679r34501

Wy . . Lambreght van ansem . Sculte to Sutphen . . Jn + der Stat . End vp + den lande . tusschen . Stienre ende der Honepe / Doen Cont allen luden . dy dessen syn brief . Solen Sien . of horen lesen . Ende Orc˚nden claerlike mit dessen briue . Dat vor ons Comen syn . jnt gherighte . Jordaen bucsbere . Sophia . sijn wijf . dy . witlic wijf Gewesen hadde . wilhms van leesten . Ende wilhem Sophien Sone . en_ wilhms hors eren mans vorsc_uen . mit sinen Gereghten monbare . ende mit sinen magen . hijr na ghesc_uen verghieden . ende becanden . Dat van . Hvnd_t marken . brabants . dy sie hadden an den G˚ede to Gybbeconck . Ende van alle dien Reghte . dy sie th˚ dien G˚ede hadden . van Erfnisse . of van anders eneghen zaken v˚l . ende ghenoegh gedaen js . Ende hijr omme hebben jordaen . bucsbere vorsc_uen . bi hom zeluen . Ende Sophia bi hant jordaens hoers monbaers . Ende . wilhm Sophien Sone . vornoemt bi hant Johans van leesten . sijns . gereghten . Geboerne monbaers . Ende oec mede . bi hant Jordaens . vorsc_uen wilhms ghezette monbare . van onsen liuen heren . Hern . Reynalde Hijr~vormaels . . Hertoge van Ghelre Greue van Sutphen . des ziele . Got onse here . . hebben moethe . welke monbare . Sophia . ende wilhm hor Sone . Jn den gherighte vor ons Coren . Ende wy hom Geuen . als Ordeile . ende reght wijsden . van dien G˚ede to Gybbeconck . ende van alle dien dat daer th˚ behoert . also . alst ghelegen js . to leesten jn den kerspel th˚ werensfelde van allen reghte . ende van alle dien . dat Sie daer th˚ . . the zeggene hadden . vry verthegen en_ vpghelaten . Ende sint des Claerlike vuet~ghegaen . th˚ bihoef end jn orbare Vrederics Stienbickers . ende sijnre Erfnamen . Ende hebben . Vredericke . end sijn G˚et Gybbeconck . vorsc_uen . quijt . vry . ende los ghescolden . als hoem daer . jn den gherichte . mit Ordelen . en_ mit reghte . ghewijst waert . dat Sie mit reghte verchten . vplaten . end vuetghaen Solden . ja oec also dat daer mit ordele / ende mit reghte ghewijst . waert dat Sie So verthegen hebben . dat Sie ghien ansprake . meir vpt g˚et to Gybbeconck . hebben mogen noch d˚en mit reghte . want Sie alle p˚ntte ghedaen . ende ghewilkoert hebben . vor ons . jn den Gerighte . mit horen vrien willen . Desse dynck . sint ghesciet . bi . willen . bi Rade en Consent . der maghe . des kynds . wilhms vorghenoemt / als Coenraeds ys_en . andrees . ys_en . Coenraeds broder . Brants van leesten . ende . Gerloghs meyerinck . dye hijr auer End ane weren . ende hoeren . willen . en_ Consent van der meenre maghe . wegene daer th˚ gheuen . Ende want alle desse dynck . sin ghesciet . openbare . vor ons . jn + den gherighte . Jn Orc˚nde . gherights . lude / als . Henrics van brienen . knape / arnolds ba_ni_ck Johans ten mersche . Coenraets bettekynck . Coenraets . hugen Sone van leesten . Lubbreght van hoenholte end anders vele guder lude . hijr omme heb wy . onse zegel aen dessen brief . d˚en hanchen . Jn vestnisse ende jn Orc˚nde . aller pontten . en_ vorwarden vorsc_uen . . . Gegeuen . Jnt Jaer vns heren . . Dusent Dry + H˚ndert . vijf ende vijrtich . des . Dyncdaeghs na sent Mathies dach . apostels . - - -