Corpus Van Reenen-Mulder (CRM14): Oorkonde F679r34902

Al die ghene die desen brief solen zien of hore_ lesen . Jc Kerstien van den Putte doe Kundich / dat ic ende mine erfnamen . Johanne boync / en_ sine erfname_ verkoft hebbe / tho eynre erfpacht / also ghedane stucke landes / alse hier na bescreuen staet / en_ in alsulker manieren / en_ vorwarden / alse hier na bescreue_ staet . Ten yersten mine_ gaerden die gheleghen is boue_ an den vaelde . voertmeer den brinc die gheleghen is tusschen den gaerden / en_ der hoymaet . voertmeer de hoymaet de gheleghen is tusschen den brincke en_ der weertmaet . voertmeer de weertmaet de gheleghen is tusschen der hoymaet / en_ der horst . voertmeer de horst / de gheleghen is tusschen der weertmaet en_ der vonne . voertmeer de bonninghermaet de gheleghen is tusschen zunte wolburghemaet en_ de_ zoderlo . Dese vorgheschreuen stucke landes vor Sesse en_ twintich schilde . jn al der vorwarden alse johans brieue vorghescreue_ hoelt . . voertmeer bekenne ic kerstien vorghes_ / en_ mine erfnamen / dat ic en_ mine erfname_ . Johanne vorghes_ / en_ sine erfname_ verkoft hebbe tho eynre erfpacht / mijn hoghe noertvene / en_ zijde / en_ mit al des landes tho~behoren mit al dien / dat daer an vallen mach van lande / alse vor / Sestien / schilde . Mer des sal jc kerstien vorghes_ en_ mine erfname_ vyt behoelden al dien tienden van noertvene alse ment zeyet / dat johan vorghes_ / en_ sine erfname_ na verpacht hebbet vor Sestien schilde / en_ de visscherye in der yselen . . En_ oec so sal ic kerstien vorghes_ / en_ mine erfnamen . Johanne vorghes_ / en_ sine erfnamen . Noertvene mit sine_ tho~behore_ vryen vor pacht / vor tins / vor al vnraet / en_ vor al ansprake / de des tho rechte comen wilt . En_ de vorghes_ meden sal ic kerstien vorghes_ / en_ mine erfnamen . johanne vorghes_ / en_ sine erfname_ waren al also alse sine brieue hoelt / de he daer of helt . Des heb ic kerstien vorghes_ / en_ mine erfnamen . johanne vorghes_ / en_ sine erfname_ . al dat vorghes_ lant verkoft tho eynre erfpacht . vor tve / en_ viertich schilde jaerlix tho betalen binne_ zutphene tho al z˚nte Mertens misse in den winter / mit schilden de also goet van golde / en_ also zwaer van ghewichte sint / daer men tho zutphene pacht mede betalen mach . en_ alrehande arghelist vyt~gheseghet . Des sette ic kerstien vorghes_ / en_ mine erfnamen . joha_ne vorghes_ / en_ sine erfnamen / mine huzinghe de gheleghen sint in der hofstraten tho zutphene / heyl / en_ vngheschaert / en_ al den pacht den johan vorghes_ en_ sine erfname_ . mi kerstien vorghes_ / en_ mine_ erfname_ jaerlix schuldich sint / also langhe alse ic kerstien vorghes_ / en_ mine erfname_ . johanne vorghes_ / en_ sine erfname_ bi rechte / dat vorghes_ lant ware_ solen . Ende dat den schepene_ van zutphene duncket / dat et joha_ne vorghes_ / ende sinen erfname_ vast ghenoech si tho allen lantrechte . en_ mit der here_ hande zeluen tho vesten dat vorghescreue_ lant . Voert~meer so loue ic johan vorghes_ / en_ mine erfname_ . kerstien vorghes_ en_ sine erfname_ alse vor de . tve en_ viertich schilde vorghes_ . dat jc johan vorghes_ / en_ mine erfnamen / kerstien vorghes_ / en_ sine erfname_ / de vorghes_ pacht sal vast maken / vyt den vorghes_ lande / dat ic joha_ vorghes_ en_ mine erfname_ . yeghen kerstien en_ sine erfname_ ghepacht hebbe / en_ vyt minen gode tho boync al heyl en_ vngheschaert mit des here_ hant / of mit des herthoghen hant van gelren . En_ dat also vast the makene dat den schepene_ van zutphene duncket dat et kerstien vorghes_ / en_ sine_ erfname_ vast ghenoech si / tho allen lantrechte / mit der tvier heren hant . eyn . de vorghes_ sint . So wien dat ic johan vorghes_ / en_ mine erfname_ lieuest hebbet . vp~dat dit vast ende stede bliue So hebbe wy kerstien van den putte / en_ johan boync vnse seghele hier an ghehanghen . jnt yaer vns heren Dusent . drie + hundert . Neghene / en_ viertich . vp zunte andries dach des apostels .