Corpus Van Reenen-Mulder (CRM14): Oorkonde F679r35301

Jc Gherloch willams sone her Mathyes . Sculte to Sutfene binne_ . en_ buten . doe kunt allen luden . en_ orcunde apenbare . in desen brieue . Dat voer mi comen is . als in gherichte . Aleyt to hotinc / met aren voermu_der . als met johan van leysten / den sie daer toe coes . En_ becande dat sie heuet vpgheboert . Ses / En_ dertich goede olde guldene scilde . guet van golde . en_ suaer van wichte . oft ghelijc payment daer voere . by joha_ne van leysten haren voermu_der / voerscreue_ . van herma_ne hoteman haren neuen . als van ofsone / van den Erue . to hotinc . dat hare vrende . van beyden siden . haer to~segheden . en_ to~maket hadden . En_ johan van leysten vors_ . becande dat hi dat voers_ ghelt / van den voernomeden herma_ne heuet opgheboert . tot aleyde behoef vors_ . en_ van hare weghen . En_ sie beyde . aleyt / en_ johan . voer hem selue_ . en_ voer haer nacomelinghe . sculden harma_ne vors_ . en_ sine nacomelinghe . van desen voerscreuen ghelde . quiit . en_ loes . en_ nu_mer~meer daer vm to manen / oft an + to + talen . hier hebbe_ mede auer wesen . beschedene lude . her willam ott_man canonic to Sutfene . gert van ampsem to lochem . wolter rasinc . en_ anders guede lude . jn orcunde des . So hebbe ic miin seghel . ghehanghen . an desen brief . Ghegheuen jnt jaer ons heren . Dusent . Drie hundert drie / en_ vijftich . vp sente Thymotheus . en_ Sinforians dach . - - -