Corpus Van Reenen-Mulder (CRM14): Oorkonde F679r35701

Jc Aernt Ne˚den soen in + der Eemer / doe kenlike alle den ghenen / dye desen teghenwardighen brief z˚elen sien / oft horen lesen / Dat jc voer my / en_ voer mijn erfghename / dye tienden beyde grof / en_ smal / van y_megriet / en_ van minen goede / dat jc nv te deser tijt / ligghende hebbe in + der Eemer voerghenoempt int kerspel van Bru_men / van + den Deken / en_ van + den ghemeynen here_ des Capittels van zutphen / ontfaen en_ ghepacht hebbe / alze dye te bezitten en_ te bruken / erffelike en_ ewelike / om ene_ ewighen stedighen pacht / van vijf mudde halfpilde corns / der maten van zutphen / daer men in + der tijt jaerlijcs pacht mede betalen mach / den voerseyden heren / en_ haren nacomelinghen / dye zelue vijf mudde corns / erffelike en_ ewelike / alle jaer / te zutphen te betalen / en_ vri te leueren / tusschen sente mertens misse / en_ kerssauont / op minen / en_ mijnre voerseyder erfghename / cost / anxt / en_ arbeyt . Jn alzulker manyeren en_ vorwarden / Weert dat jc / oft mijn voerseyde erfghename / des niet en deden / So muchten dye voerseyde heren / en_ hare nacomelinghe / alle jaer / den voerseyden pacht / en_ stedicheyt / wt minen voerseyden alinghen goede / oft wt anders allen minen goeden / en_ mijnre erfghename voerghenoempt / so waer dat dye gheleghen weren / doen wt~peynden / met den daghelijcschen richter / zonder e_nich wederzegghen . En_ Voertmeer / Weert dat jc / oft mijn voerseyde erfghename / dye voerseyde pande / niet en l˚esten / binnen vierte_nachten / so moghen dye voerseyde heren / oft hare nacomelinghe / dye zelue pande vercopen / alzy alre~hogheste co_nen / om rede ghelt / haren voerseyden pacht / en_ stedicheyt / en_ alle moghelike scade / en_ cost / dye sy daer om deden / daer aen te verhalen / en_ in te halden / zonder e_nighe vervolghinghe des rechts / ghelikerwijs / alze oft sy met recht vervolghet weren . Jn orco_de deser dinghe / so hebbic Aernt voerghenoempt / voer my en_ voer mijn voerseyde erfghename / minen zeghel / aen desen brief ghehanghen . En_ om te meerre vestenisse / so hebbic ghebeden herman oppenweerde / en_ johan spaen van steenre / want sy hier ouver en_ aen gheweest hebben / daer dese dinghe ghesciet sijn / dat sy hare zeghele / aen desen brief willen hanghen . En_ wy herman / en_ jan voerghenoempt / want ons dese singhe wael condich sijn / en_ wy daer ouver en_ aen gheweest hebben / Alze voerscreue_ steet / so hebbe wy te meerre vestenisse / om beden wille / des zeluen Aernts ne˚den soen / en_ der ghemeynre heren voerghenoempt / onse zeghele / aen desen brief ghehanghen . Ghegheue_ int jaer ons heren / dusent drye + hondert en_ zeuen en_ vijftich / op sente Agathen dach . . .