Corpus Van Reenen-Mulder (CRM14): Oorkonde F679r36401

Jc Vrederic van Recht_e Ridder / doe kunt allen luden / dye desen teghenwardighen brief zolen zien ofte horen lesen / Dat voer my comen is kerstiaen ten Put va_ zutphen / en heuet becant dat hy den . . Deken / en_ den ghemeynen heren des capittels van zutphen / alze voer dat een malder corns dat hy vors_ te heer toe jaerlijcs sculdich heuet gheweset wt synen goede gheheyten Nortphen / dat hy van my te leen helt / gheleghen by galghenberch / int kerspel te zutphen / En_ voer dye zesse maldere rogghen / en_ zesse maldere corns / dye hy vors_ te heer + toe jaerlijcs sculdich heuet gheweset wt syne_ goede / gheheyten dye grotehorst / gheleghen / int vors_ kerspel van zutphen / voert~aen erffelike alle jaer gheue_ sal / den voerseyden here_ / dertien pont cleynre pe_ninghe / op sente mertens daghe in + den winter / in alzulken payme_t / alze ghenghe / en_ gheue is / Et daer men pacht en_ jaerrenten in + der tijt te zutphen ghemeynliken mede betalen mach . Jn alzulker vorwarden . weert zake / dat hy ofte zyne erfghenamen des niet en deden / so moghen dye voers_ heren / ofte hare nacomelinghe / dye voerghenoemde dertien pont / wt beyden zynen voerghenoemden alinghen goeden / nortfen en_ dye grotehorst onghesceyden / doen peynden / met den daghelijcschen richter / daer dye goede gheleghen sijn / en_ met dien panden voertvaren alze recht is . En_ wa_t jc vrederic voerghenoemt / een leen~heer bin / des goets te Nortphen voerghenoemt so hebbic om beden wil / des voers_ kerstiaens ten put / mijn hant / en_ mijn consent / hier toe ghedaen . Hier hebbe_ ouver en_ aen gheweset / myne ma_ne / alze heynric ten bongarde / en_ Euert horstinc . Jn orco_de deser dinghe / so hebbic myne_ zeghel / met des voerseyden kerstiaens zeghel aen desen brief ghehanghen . En_ jc kerstiaen ten Put voerghenoemt / om te meerre vestenisse deser voerscreue_ zaken / so hebbic myne_ zeghel / met des voerseyden h_ren vrederics mijns heren zeghel / aen desen brief ghehanghen . Ghegheue_ int jaer ons heren dusent drye hondert vier en_ tsestich / des anderen daghes na sente jans daghe baptiste / Decollatio . . -