Corpus Van Reenen-Mulder (CRM14): Oorkonde F679r36501

WJ Johan van Moerse . Ridder doen kenlic allen luden die desen brief soelen sien oft horen lesen / dat wi van + den Deken en_ van + den gemeynen Capitel van zutphen ontfaen en_ aen~genamen hebben voer ons en_ voer onse erfgenamen tot ewigen dagen der voerseider Heren tienden gelegen in + den weert van Heteren in + der betouwen om enen stedigen erfpacht van twelef mauder halfspilde coerns der maten van Arnhem / die selue twelef mauder te leueren en_ te betalen op onsen cost / anxt en_ arbeyt alle Jaer op Sente Andreas auont des Apostels oft bynnen viertynnachten daer nae ombegrepen als men + se alre~naest der voers_ Stat van Arnhem te Scepe brengen mach / den voerseiden H_en oft haren warachtigen bade die si des mechtich gemaect hebben oft mechtich maken soelen in + der tijt . Jn alle dierre maniren en_ vorwarden als Her Dideric van Heteren en_ sine nacomelingen die selue tienden van + den voerscr_ Heren hier voermaels ontfaen en_ aen~genamen hadden en_ beseten hadden / dat is te weten / Weert dat sake dat die voerseide Heren oft haer nacomelinge ons oft onsen erfgenamen verbreken in beleninge deser voerseider tienden in maniren als voerscr_ is soe vervielen die voerscr_ Heren alle haers rechts en_ eyghendoems dier seluer tienden en_ daer toe soe vervielen si in eenre penen van twintich marcken brabansche payments genge en_ gheue in + der tijt tot onser behoef en_ onser erfgenamen en_ voertmeer weert oec sake / dat wi oft onse erfgenamen verbreken in + der voerseider betalingen jaerlix te doen in alder maniren als voerscr_ is soe weer wi oft onse voers_ erfgenamen veruallen van allen recht der voerseider beleninge van + den voerscr_ tiende / ende soe muchten die selue Heren mit haren voergen_ tienden haren vrien wille doen / en_ daer toe Soe soude wi oft onse erfgenamen veruallen sijn in eenre pene van twintich marcken brabansche payments voerseit tot behoef en_ opboringe der voerscr_ Heren en_ haer nacomelinge . Jn oerconde deser dinge Soe hebbe wi johan van Moerse Ridder voerseit voer ons en_ voer onse nacomelingen en_ erfgenamen onsen segel aen desen brief gehangen . Jnt Jaer ons H_en Dusent Drie + hondert en_ viue en_ Tsestich op Sente Michiels Auont