Corpus Van Reenen-Mulder (CRM14): Oorkonde F679r36701

Wy willem h_e van bronchorst Drossaet in den lande van Sutphen make_ cont allen luden Ende tughen mid desen apenen breue Dat vor ons sint ghecomen daer wy to gherichte saten mid gherichts luden de hijr nae bescreuen staen Euerd Sloet hildegont sijn Echte wijf mit ors Mombaren hand de or mit ordel Ende mit rechte ghegeuen ward Ende Dyderic orre Twier Echte sone Ende droghen daer vp alse se mit rechte solden alle ore Erfnisse Ende recht dat se hedden an den gude to hasewalde dat gheleghen is jn den kirspele to wichtmonden to behoef den jonfrowen van den hospitale van Sutphen alichlicke alset dese vors_ jonfrowen her to vnder hebben ghehat . Ende hebt daer vp verteghen alse se mit rechte solden to behoef deser vors_ jonfrowen des hospitaels vors_ also dat vm ordel Ende Recht wisede dat se daer nyet meer an en hebben . Noch nyet an te wachten en sin Daer dit gheschede daer waren auer En_ ane gherichts lude Ghisebert duuel johan van br?en Ende anders vele goder lude Jn orkonde alle deser dinch So heb wy willem h_e van bronchorst Drossaet vors_ onse seghel an desen apenen brief ghehanghen jnt jaer ons h_en Dusend Dre + hondert Soue_ Ende Sestich des jrsten Dinsedag_ nae Paschen