Corpus Van Reenen-Mulder (CRM14): Oorkonde F679r37001

Wy . . Deken ende ghemeyne Capitel des godshuys van zutphen bekennen met desen teghenwardighen brieue / Dat wy met Peter van steenberghen / alze van alzulker twychgachticheyt / alze tusschen hem en_ ons r˚erende was / van den goede dat gheheyten is / tgoet ten merssche / gheleghen by luzenbossche op dye velu / jnt kerspel te voerst / Dat wy den zeluen peter hier + voermaels vercoft hebben / des also in moetzoene_ met hem ouverdraghen sijn / Dat wy hem / en_ sinen erfghenamen / voert~aen / tien jare lanc / na data des teghenwardighen briefs / en_ nyet langher / bouen dye tien pont en_ tien scillinghe cleynre pe_ninghe / dye Roelant van zijnderen / dien zeluen peter oft synen erfghenamen / van onser weghen / wt den zeluen vors_ goede ten merssche dye vors_ tien jare lanc gheuen sal / en_ sculdich is te gheuen / na den brieue / dye dye zelue roelant daer af van ons heuet / bezeghelt met ons capittels zeghel / geuen / betalen en_ leueren solen / in + der stat te zutphen / alle jare te sente Peters misse ad cathedram neghen pont / en_ tien scillinghe cleynre pe_ninghe Payments ghenghe en_ geuen in dier vors_ stat van zutphen / daer men jn + der tijt jaerlike renten in dier zeluer stat / mede betalen mach . Ende met deser moetzoenen / so heuet dye vors_ Peter verteghen alre zaken / dye hy op ons / oft onse godshuys / in e_negherande manyeren / te zeggehen ofte crüenen hadde / van + des vors_ goets weghen . Voertmeer so eest vorwarde / Dat dye vors_ peter oft syne erfghename na sijnre dode / alle jare / dye vors_ tien jare lanc / so wanneer dat wy vn / dye vors_ jaerlike pensye / alze neghen pont tien scillinghe elkes jaers betaelt hebben / ons een goede quitantie geuen solen van dien jare . Ende so wanneer Dat dye leste pensye van den vors_ tien jaren betaelt is / so sal dye zelue peter / oft sijn erfghename ons desen teghenwardighen brief ouverleueren / en_ quijt schelden va_ allen voerleden jaren . Jn orconde deser dinghe / so hebbe wy ons capittels zeghel / met des vors_ peters zeghel aen desen brief ghehanghen . En_ jc peter van steenberghen voerghenoemt / bekenne alle deser voerseyder zaken / Ende jn orconde des / so hebbic mynen zeghel / met des vors_ dekens en_ capittels zeghel / aen desen brief ghehanghen . Gegheuen jnt jaer ons heren dusent drye + hondert / ende tseuentich / op sente Peters dach Ten jngaenden oghest . dye men heyt ad vincula .