Corpus Van Reenen-Mulder (CRM14): Oorkonde F679r37101

Jc Johan van + der Lawijc richter vp velu do kundich allen luden de desen brief zoelen zeen of horen lesen Dat voer my quam to voerste do jc tho gherichte sat Gheertruet hertghers herman creynges dochter van zutphen Ende becande dat se hadde vercoft erflike en_ ewichlike en_ droech vp mit henricke sc˚rinc eren karen mombaer mit ordel en_ mit rechte Her henricke vppen Essche enen ewighen vicarijs in s˚nte walburghe kerke to zutphen of we hoelder is des brieues mit her henrickes wille vors_ Dat alinghe lant dat se heuet wt den goede to bannync dat gheleghen is to noertEmpe in + den kerspel to voerst dat hier vormaels was ver + hillen hertghers mit alle zinen to~behoeren mit aller slachter not voer een tijnsgoet ledich en_ loes van aller pacht en_ van aller sc˚lt wt~ghespraken vier oelde grote / dye zal men to tijnze gheuen alle jaer vp sente Mertens dach in + den winter in + den hof to loe vten vors_ lande / voer een somme gheldes dye her henric vors_ / Gheertrude vors_ wael betaelt heuet / Ende Gheertruet vors_ droech vp her henric vors_ voer my dat vors_ lant en_ heuet daer vp verteghen voer eer / en_ voer eer erfghenamen / en_ js des wt~gheganghen als recht js to behoef heren henrickes vors_ of we hoelder js des teghenwardighen brieues myt synen willen . Voertmeer lauede Gheertrud vors_ den voerghenomeden her henricke des vors_ landes to waerne jaer en_ dach wo men erfcopes to rechte waren sal voer al de ghene dees to rechte coemen wilt . Al arghelist vyt~ghesproken . Hier weren aen ende auer mit my gherichtes lude / alze her johan van c˚unre een Ridder / henric peters sone / aelbert de boze / willem ter deernehorst / Reyner foysen zone / wenemer ter wartelt en_ gheert de snyder / en_ anders vele goeder l˚de . Jn tuich deser vors_ zaken oppe~dat ze vaste en_ stede bliuen / zo heb jc johan van + der lawijc vors_ mijn zeghel aen desen apenen brief ghehanghen . Ghegeuen jnt jaer ons heren D˚sent / Drye + hondert / een en_ tsouentich / des vriedaghes na s˚nte katherinen dach ener joncvrouwen .