Corpus Van Reenen-Mulder (CRM14): Oorkonde F679r37701

Jc Johan spaen : sculte binnen : zütpHen en_ bute_ . vppen lande Tughe mit desen apen_ brieue : Dat vor my gecomen Js in sittenden gerichte . Trüde : Drinemans : wijf en_ bekande : mit Oeren vrien willen : en_ mit Oeren gecoeren Momb_ : vor Oer en_ vor Oer Erfgen_ . dat sie Erflike ewelike . en_ vmmermeer . vercocht / en_ vp~gedragen heuet . alze Oerdel en_ recht wisede : Den Joncfrouwen van + den Hoesspitaele tot zutpHen : Eyen stücke lants : gelegen Jn + den boeuen~lande : jn + der buerscap : van Hesewoelde en_ jn + den kerspel van wichtmünden : alze dat stücke lants streckende js An dyen wech : dye daer giet van wichtmonden tot zutphen waert / vort so Heuet Trüde : Drinemans vors_ : den vorges_ Joncfrouwen van den Hosspitaele : en_ Oeren nacomelingen : vor Oer / vor / Oere Erfg_ en_ nacomelingen . dit verges_ stücke lants . gelaüet / to waren alze Erfcops recht js . vor alle . die ghene : die des ten rechte comen willen : vort / so bekande Trüde vors_ dat Oer dit gelt van + desen vors_ lande : wal betaelt were : daer Oer wal an genoegede : sonder argelist Hijr weren Auer en_ An gerichts lude Gerd rockinc . en_ Gerd koster : Jn een recht tuÿch der waerheyt : So Hebbe Jc scülte vors_ : mijn segel An desen brief gehang_ . Gegeüen jnt jaer vns Heren . M˚ CCC˚ soüen en_ souentich vp sente Cecilien dach