Corpus Van Reenen-Mulder (CRM14): Oorkonde G507r39501

@ Ich , Berneer van Ellerslo , bekenne ende betughe in dezen openen breve , dat ich hebbe vercoft den vogheden van onser Vrouwen + kerke to der A in Groninghen alle dat holt , dat to Rolde leghet , dat to Bruensweerde solde ghewezen hebben , vor een ende vyertich nye Ghelresche gulden ende twe balken , de legghen to Bruensweerde ende ses balken , de leghen tot Ellerslo tosamen vor vyer ende twintich gulden . Ende dit vors_ holt sal ich hem leveren unbehindert ende unbecummert van alre ansprake , so + waneer dat zie met horen waghenen komen dat vors_ holt to halen . Ende weert sake dat ich des nyet en dede , so mochten my de vors_ voghede daer + vor manen of by horen wissen bode doen manen an mynes selves mond of to Zuedlaren , daer ich nu ter tiit wone . Ende so love ich ende sekere in guden trouwen in to komen in mynes selves persoen in Groninghe bynnen tween daghen na der maninghe ende daer nyet uet der stad to scheyden , eer ich hem dat vors_ holt gheleverd hebbe ende hore mode daer + van ghewonnen hebbe , al arghelist uetghesproken . In orkunde , want ich , Berneer vors_ , selven negheen zeghel en hebbe , so hebbe ich ghebeden her Henric , mynen cureyt , dezen breef vor my to beseghelen . Ende ich , her Henric vors_ hebbe myen seghel an dezen breef ghehanghen um bede wille Berneers vors_ Ghegheven int jaer ons Heren M + CCC + XC + V up Elven + dusent Meghede dach .