Corpus Van Reenen-Mulder (CRM14): Oorkonde G528r39701

@ Ic , heer Laurens Joncher , cureit van Beylen , doe kont allen luden , die desen brief zullen sien of horen lezen , dat voer my ende voer berve lude , die hier + na bescreven staen , quam Ludeken Meninge ende bekande openbaerlic , dat hy ontfanghen had van eerbaren heren den praefst , deken ende capittel der kerken van sunte Peter tUtrecht in enen erfpacht een gued gheheyten Benningegued to Holte , gheleghen in den kerspel van Beylen , met bosch , met broke , myt water , myt weyde , myt torve , myt twige , mit alre nutscap ende sinen tobehoren alst gelegen is , in dusgedanen voirwarden als hier + na bescreven staen . In den yersten bekent Ludeken voirscreven , dat hy opdragen ende quijtscelden sal alsulc recht als hy hevet ruerende van tien stede Groninger m˚d , ses mud roggen ende vier mud geerstensmoltes , die hy gecoft hevet tegen Arent van Steenwijc ende Jan van Steenwijc ghebroders , ende sal dier voirs_ mud afgaen na den recht van den lande ende sal den voirs_ heren een betoen daer + af gheven . Voert bekent deselve Ludeken voir hem ende vor siin erfgenamen ende nacomelinge , dat hy jaerlix betalen sal in den hof tot Uffelt tot des praefsts behoef van sunte Peter tUtrecht vors_ op alle Goeds Heyligen dach neghen mudde wynterroggen Groninger mate , op den Palmdach een henne mit tien eyeren , ende op den Meydach neghen mud gerstensmoltes Groningher mate voirs_ in den voirs_ hof tot Uffelt . Voert bekent dieselve Ludeken voirs_ , wert sake dat hy ende siin erfgenamen ende nacomelinge desen voirs_ pacht nyet en betaelden op desen voirs_ termiin , soe soude hy , ziin erfgenamen ende nacomelinge voirs_ den vors_ praefst in der tijt des naesten dages verleden na elken termijn vorscreven desen vorscreven pacht twyscat of dubbel betalen , sonder enich wedersegghen . Voert bekent dieselve Ludeken vorscreven , wert sake dat hij noch siin erfgenamen ende nacomelinge vorscreven desen vors_ pacht binnen viertien dagen naestverleden na elken termiin vorscreven nyet en betaelden , soe weer Ludeken voirs_ , zijn erfgenaem ende nacomelinge vervallen van allen recht ende tozeggen , dat zy hadden of hebben mochten an desen vors_ guede . Ende dit vorscreven goed sal dan vry , los ende ledich wedercomen an dese vors_ heren horen vryen wil mede to doen , al + zoeveer als zijt annemen willen ende anders nyet . Nochtan soude Ludeken voers_ , zijn erfgenaem ende nacomelinge vors_ den vorscreven praefst in der tijt betalen alzulken pacht ende penen , als hi dan in restant schuldich were . Voert bekent dieselve Ludeken , dat hi noch ziin erfgenamen ende nacomelinge dit vors_ gued tot gheenre tijt vercopen , ? noch versellen en solen , noch gene bezwaringe van pacht of van anderen onrade op dit voirs_ goed brengen en solen buten consent ende wil deser vors_ heren . Ende dit vors_ gued sal al geheel bliven an enen naesten erfgenaem , ongesceiden ende ongedeilt . Voert bekent Ludeken voers_ , wert sake dat hy , siin erfgenamen ende ? voers_ enich van desen voers_ punten braken ende nyet en hielden noch en deden als vorscreven is , so vielen zy ende een ygh~elic van hem bysonder van allen recht ende toseggen , dat zy hadden of hebben mochten an desen vors_ guede . Ende dit vorscreven gued sal dan vry , los ende ledich wedercomen an desen voers_ heren horen vryen wil mede to doen , sonder enigherhande krot of hinder van Ludeken , zinen erfgenamen ende nacomelinge vorscreven , al + zoeveer als ziit annemen wouden ende anders nyet . Alle argelist uutgesceiden . Ende om der mere vestenisse wil , want Ludeken voirs_ wil , dat al dese vorwarden ende punten vast ende stede gheholden zullen wesen voer hem ende voir siin erfgenamen ende zine nacomelinge voirs_ , so hevet hij my ghebeden dese voirs_ vorwarden ende punten over hem te besegelen tot enen getughe , want hij selven gheen segel en hevet . Daer dit ghesciede , waren an ende over als tugheslude heer Egbert Loberinghe , Leffart Ebelinghe , Lambert Wedekinge , Willam Ludinge , Hillebrant Mackinge , Wolter Tybbinge ende ander ghebuere . Ghegeven int jaer ons Heren dusent drie + hondert seven ende tneghentich des Dinxdaghes na sunte Laurens + dach .