Corpus Van Reenen-Mulder (CRM14): Oorkonde G528r39702

@ Ic , heer Laurens Joncher , cureyt to Beylen , doe kundich allen luden , dat vor my gecomen is ende voer die bure van Beylen , die hier + na bescreven staen , Ludeken Meninge ende scolt daer quijt vor hem ende siin erfgenaem to behoef der praefstien tsunte Peter tUtrecht alzulc tien mud alze hie had over Benningegued to Holte in den kerspel van Beylen , die hy ghecoft had teghen Arent van Steenwijc ende Johan zinen broder ende horen erfgenamen , alzo~dat Ludeken voirs_ of siin erfgenamen mit rechte niet meer an die vors_ tien mud to wachten of to waren en hebben . Sonder al argelist . In een tuych deser vors_ quijtsceldinge , want Ludeken vors_ gheen segel en hevet ende wil , dat alle dese voers_ punten stede ende vast bliven zullen vor hem ende siin erfgenamen ende sine nacomelinge voirs_ , so hevet hy my gebeden dese vors_ vorwarden ende punten over hem to beseghelen ende sinen erfgenamen tot enen ghetughe , want hy selven gheen segel en hevet . Daer dit gheschiede waren an ende over als ghetugheslude heer Egbert Loberinghe , Leffart Ebelinghe , Lambert Wedekinge , Willam Ludinghe , Hillebrant Mackinge , Wolter Tybbinge ende ander gebuere . Ghegeven int jaer ons Heren dusent drie + hondert seven ende tneghentich des Dinxdaghes na sunte Laurens + dach .