Corpus Van Reenen-Mulder (CRM14): Oorkonde G548r38301

@ Allen luden die dessen brief sullen sien of horen lesen doe ich verstaen . Johan van echten dat ich puerlich om godes willen hebbe gegheuen erflike en_ gheue voer mi en_ voer mine rechte erfghename mit desen opene_ brieue in de heylighe kerke to R˚nen . drie Groning mudde winter~rogghen Jaerliker pacht die de Cureyt van Runen Jaerlycs boren sal en_ ontfaen wt minen mudde to pette ouer al sulc erue alse folkier van echten mijn vader hadde ghedaen den gherberinghen voer al sulke mudde die de gherberinghe Jaerlix betalen sullen to sunte Martijns misse . en_ van den vors_ mudden sal die Cureyt die in dier tijt is . Jaerlix mede betughen en_ verwaren wijn en_ hostien to godes dienste en_ oec den wijn to gheuene . den luden die dat heylighe sacrament ontfaen to paeschen to pinxteren en_ to middewinter / Voert so sal die Cureyt van Runen alle sonnendaghe en_ ander hochtide als hy in den predic~stoel gheet doen bidden ouer die kerke sonderlinghe voer Johanne van echten vors_ desse vors_ mudde_ schelde ich Johan van echten vors_ quyt en_ vplate ledich en_ loes mit allen rechte daer men ghulde ofte goede mede quyt~schelden mach in drenthe voer de bure van pette . en_ hebbe den stok gheleghet . alse lantrecht is die vors_ mudde erflike en_ vmmermeer to bliuen in der kerken to Rune_ niet in dat Co_uent in maniren alse vors_ is En_ die vors_ mudde anders niet to wendene noch to kerene sonder enigherhande arghelist alse vors_ is . Jn orconde der waerheit hebbe ich Johan vors_ minen seghel an dessen brief ghehanghen voer mi en_ voer mine rechte erfghenamen . Gegheuen int Jaer ons heren . dusent drie + hondert drie en_ achtentich des so_nendaghes to beloken paeschen