Corpus Van Reenen-Mulder (CRM14): Oorkonde G574r36301

@ Wi , Johan van den Cloester , ridder , ende Johan van der Ese , knape , doen condich allen luden , die desen opene brief solen sien oft horen lesen , dat vor ghecomen sint Rolof , Henric ende Johan , broedere van Echten , hebben ghesekert ende ghelovet , sekeren ende gheloven in goeden trouwen in desen opene brief in onse hant , dat si tot ons solden gaen ende bliven ende tot onsen segghen en solden nemen en alinghe broederesceydinghe van alsulken goede als Folkier van Echten orre vader , daer God die ziele van hebbe moet , achter hevet ghelaten int leste van sinen leven . Des hebbe wi ons anghenomen , besproken ende beraden ende hebben ghemaket en erfsceydinghe tusschen dese bruideren van Echten vorghenoemt in alsulken manieren als hir + na bescreven steet , dat is te verstaen , dat wi toeghesat hebben ende toegheseghet Rolof van Echten vorscreven den oldesten brueder vor sijn vaderlic erve al dat goet , dat gheleghen is in der marken tot Echten , ruerende ende onruerende , dat Folkier toebehoerde int lest van sinen leven , uutghesproken in de Nye Zwanekinghegoet , item al dat goet ende tyenden , dat Volkier vorscreven toebehorde ende gheleghen is in den kerspel van Zuutwolde , uutghesproken dat vierendel van der Horst sonder tienden ende mede uutghesproken achte mudde rogghen jaerlikes over Copes goet des Dubbers . Item sal Rolof vorscreven hebben den tienden tor Linthorst ende so wat Folkier vorscreven toebehorde van des Crumen goede in der Holeweyde . Item sal Rolof hebben den halven tienden over Wenninghegoed to Pette ende en maet gheleghen in Pettermarke , gheheyten die Blicmaet , die Volkier vorscreven toebehorde . Item sal Rolof hebben over Hermansgoet tor Hofstad elf vierendel boteren ende over en maet gheleghen tor Hofstad tve vierendel boteren , item oestwart van Droghekens huus in der Holeweide elf vierendel boteren ende over die Linthorst vier vierendel boteren . Item sal Rolof vorscreven hebben vier roede penninghe op Kockanghen ende die pacht ende dat goet to Paeslo ende die lude , die daer + in rueren . Item sal Rolof vorscreven hebben in eyghendoem Herman tor Hofsteden ende Metten , sijn wijf , ende Hillen Johans dochter toen Haghen . Vortmer sal Rolof hebben al die scult , die die here van Covorden sculdich was Volkier vorg + . . Ende hir + mede sal Rolof van Echten vorscreven ghesceyden wesen van sinen vaderliken erve , van Henric ende Johan van Echten , sijn broedere , mit desen goede vorg + . , dat hem is toegheseghet , als hir + vor bescreven steet . Vortmer sint vorwarden , dat Rolof van Echten vorg + . sal holden ende boedelen van den goede , dat wi em toegheseghet hebben als vorscreven is , Amelen , sijn suster . Ende wart dat Amele storve onberaden ende sonder bort , die solde alleen erven op Rolof vorscreven , oren broeder . Vortmer wer dat enich van Rolof , Henric ende Johan , bruederen van Echten vorscreven , storve , die solde dan erven op die anderen levende brueder tot oren maghen segghen , uutghesproken rasure ende al arghelijst in desen opene brief . Omdat wi Johan van den Cloester , ridder , ende Johan van der Ese , knape , vorscreven , willen , dat dese sceydinghe , die wi ghemaket hebben , stede ende vast blive ende wael gheholden werde , so heb wi onse seghele an desen brief ghehanghen . Ende om merre orconde ende vastenisse des brieves ende deser sceydinghe vorg + . , so hevet Henric ende Johan van Echten , bruederen vorscreven , mit ons desen brief beseghelt mit oren seghelen , want hem wael ghenueghet aen deser sceydinghe . Ende wi Henric ende Johan van Echten , broedere vorg + . , ghelyen van deser brueder~sceydinge vorscreven ende loven dese sceydinghe wittelic ende wael te holden in allen manieren ende vorwarden , als hir vorscreven steet , sonder enich aensprake van onser weghen . Daer + op so hebbe wi , Henric ende Johan , bruederen van Echten vorg + . , onze seghele mede an desen brief ghehanghen in en orconde al deser vorscreven dinghen . Gegheven int jaer ons Heren dusent drie + hondert drie ende sestich op sunte Gallen dach .