Corpus Van Reenen-Mulder (CRM14): Oorkonde G574r36401

@ Alle dieghene , die dessen brief zolen zien of hoeren lezen , doe ich kondich , jonghe Johan Sloet , Jutte , mijn echte wijf , dat wy verwesslet hebben ende verwesslen Roelve van Echten ende zinen gherechten erfghenamen neeghen Groningh mudde rogghen , stheder mudde over al Bentinghegoet , dat gheleghen is in der maerke van Echten , sonder jenegherhande anspraken jonghe Johans Sloets , Jutten sines echten wives of haeren gherechten erfgenamen . Ende ummedat wy willen , dat dit stede ende vast blive , soe heb ic , jonghe Johan Sloet voergescreven , dessen brief byzegelt mid minen zeghele voer my selven ende voer Jutte , miin echten wijf , ende voer onse gherechten erfghenamen . Ende ich Jutte , jonghe Johans Sloets echte wijf , ende onse gherechte erfghenamen ghelien alle desser voerghescreven wesle onder jonghe Johan Sloets zeghel . Int jaer onss Heren dusent drie + hondert vier ende tsestich dies Vrijdaghes nae Paschedaghe .