Corpus Van Reenen-Mulder (CRM14): Oorkonde G574r37501

@ Allen luden , die desen brief zolen zien of horen lesen , dat ic , Johan van der Eze , kundich ende lye openbaer in desen openen brieve , dat ic schuldich bin van gherechter schult Henric van Echten of zinen erfgenamen , weer hij niet , vijftienden halven oelden Vrancrixschen schilt ende IIII placken , die Vrancrix schilde voerscreven goet van gholde ende recht van ghewicht of ghelijc payment daer + voer te betalen , nu up sante Jacops + dach naestcomende na date des brieves . Waert dat ic des niet en dade , zoe zeker ic in goden trouwen ende in rechte eedstad , ghelikerwijs of ic up enen velde ghevanghen waere , des naesten daghes na sante Jacobs + daghe nu naestcomende in te comen tot Zwolle ende daer nummer hen te scheyden , ic en hebbe Henrike voerscreven of zinen erfgenamen dit voerscreven ghelt vol ende al betalt den leesten penning mitten yrsten . Voert waert zake dat ic des niet en helde , alse voerscreven is , zo wat scaden , cost of onraet Henric voerscreven daer + omme dade of lede , den zolde ic Johgan voerscreven ende miin erfgenamen Henrike ende zinen erfgenamen uprichten ende betalen tot oers zelves zeggen sunder ede ende sunder enigherhande wederzeggen . Ende we holder is des breves mit willen Henrics voerscreven of ziins erfgenamen , die is maenre des gheldes voerscreven in alre voerwaerde voerscreven . Al arghelist uutghezeghet . In orcunde des briefs bezeghelt mit minen zeghel int jaer ons Heren dusent dre + hundert vijf ende tsoventich des Manendaghes over des hilighen Sacramentes + dach .