Corpus Van Reenen-Mulder (CRM14): Oorkonde G595r35001

@ Wy Reynolt , here van Covorde unde van Borchlo , ende dat mene lant van Drenthe doet cundich al denghenen , de dessen openen bref solen sien jof horen lesen , dat wi mit der stad van Groninghen hebben ghedaen ene alinghe zone unde ene vaste ende stede zone van allen saken de wesen hebben tusken uns ende der stad . In ersten dat de van Groninghen hebben ghegheven ende wol bitalet ene summe van ghelde , als van Hinrike , des heren broder van Covorde , den~Vroliken ende Copekine van Dalen ; des sole wi here van Covorde ende dat lant van Drenthe velighen de borgers van Groninghen in Drenthesken lantrechte vor de van Pedze , van Roden ende de van Roderwolde , sunder allene an den dren kerspelen , derwile dat dit orlogh staet . Ist voertmer sake , dat wi Reynolt , here van Covorde unde Borchlo , dat moghen vordeghedinghen mit der stad , dat ze unse ghelt , dat wi slaen laet , willet nemen , dat is goet ; is des nicht , se solen dar unverbunden to zin . Voertmer were dat dar jenighe breve were inghebroken van vredebreven van der stad jof van den lande van Drenthe , dat sal men birichten na den breven ende de coepman sal varen mit ziner coepenscap , war he wil , biholden den heren van Covorde al zines rechtes . Ist oec sake , dat en stadman hebbe to claghene up enen lantman van Drenthe unde wolde men em dat recht verstoren , dat solde wi mit den gherichte van Covorde ende mit der mente helpen vollenbringhen , ende desghelike solen de raetlude van Groninghen den lantluden helpen rechtes in orer stad , ende van neghenen saken sal men roef jof brant noch vanghenscap maken tusken den lande unde der stad , dat en zi wol vervolghet . Voertmer van der sake , de wesen hevet tusken Hinrike , des heren oem van Covorde , ende zinen hulperen ende unser stad ende unsen hulperen , dat sal wesen ene olde zone unde ene alinghe zone van al dat dar + af gheresen is , in al den ponten , de hir + vore ghescreven staen . So sal wesen uetghesproken alle arghelist . Dat orcunde wi Reynolt , here van Covorde ende van Borchlo , ende dat lant van Drenthe mit unsen seghelen . Gheven int jar uns Heren dusent dre + hundert ende vijftich des Zonendaghes na sunte Sixtus + daghe .