Corpus Van Reenen-Mulder (CRM14): Oorkonde G595r37101

@ Allen luden , die dessen brief zullen sien of hoeren lesen , . wi . Johan , here van Covorden , voer ons ende Reynold , onsen soen , die noch onm˚ndich is , Herman van Covorden voer mi ende Henric , minen soen , die noch onm˚ndich , is ende . Godevart van den Oldenhave , anders gheheyten van Haren , maken cond ende bekennen openbaer mit desen brieve , dat wi van eersamen heren , . den doemdeken ende ghemeyne capitel ten . Doem tUtrecht , in pachte ende in huerwere ontfanghen hebben tot onsen live alse langhe alse onser enich leeft ende nyet langher , alle hoere weerlike gherichte ende heerlicheyt , hoghe ende leghe , te Groeninghen ende te Zelewaert mit Wolde ende Gho ende alle hoere toebehoeren , alsoe als die hem ende hoerre kerken ten Doem voerseyt toebehoren , uuytghenomen ende beholdelic hem ende hoere kerken alsulken tijns , tienden ende renten ende ander erfnisse , als zy daer ligghende hebben , elx jaers om vijf marc fijns ende puers zilvers van ghewichte der stat van Utrecht ofte die weerde daer + voer aen paymente , dat ghenge ende gheve is in der tijt der betalinghen , die wi ende en ighelic van ons mit ghesamender + hant den heren voerscreven sculdich wesen z˚llen alse langhe als wi of enich van ons vyven leeft , ende die wi hem betalen z˚llen jaerlix binnen hoerre kerken van Utrecht zonder enighe afcortinghe ofte vermijnringhe hoers voerseiden pachts om enichs commers wille ofte enighe lettenisse , die ons aen den voerseyden gherichte ende heerlicheyt gheschien mochte , ofte om anders enighe zaken , op ons zelfs cost , anxt ende arbeyt , tot zunte Peters misse ad Cathedram nu naestcomende ofte binnen viertien dagen daer + na onbegrepen ende alsoe voert jaerlix , in alsulken voerwarden ende manieren : waert zake dat hem die voerseyde pacht al alingh op zinen daghen , als voerscreven is , van onser weghen nyet betaelt en worde , zoe vellen wy allegader ghemeynelike ende onghescheyden , ofte die van ons in dier tijt levede of van ons quamen , van der voerseyder huerwere ende van allen rechte , dat wi ofte onser enich hadden of hebben mochten aen der heerlicheyt ende gherichte voerghenoemt , alse verre als die heren voerscreven wolden ende anders nyet , beholdelic hem nochtan den verzeten pacht , die hem onbetaelt were . Voert zint voerwaerden , dat wi noch onser engheen en z˚llen noch en moeghen onse pacht , recht ende huerwere des gherichts ende der heerlicheyt mit horen toebehoren voerscreven versetten noch versellen noch vercopen noch in gheenrehande manieren aen yemant anders brenghen , onder der penen van vervallinghen voerscreven , ten ware bi der heren des doemdekens ende des capitels voerseyt consent ende wille . Ende zoe wanneer wi , . Johan , here van Covorden , Reynold , Herman , Henric ende Godevaert , nyet langher en ziin , zoe comen die gherechte ende heerlicheyt mit horen toebehoren voerscreven weder vry ende los aen den heren den . doemdeken ende capitel ten Doem ende hoere kerke tUtrecht voerseyt , horen vryen wille daer + mede te doen zonder yemans wederzegghen . Oec zint voerwaerden , dat wi ende en ighelich van ons den heren voerscreven ende horen boden v˚erdelic ende behulpelic zellen wesen tot horen renten , die zy daer ligghende hebben , in te manen ende te verkrighen na onsen vermoeghen , zonder arghelist . In orconde des briefs zoe hebben wi , . Johan , here van Covorden , voer ons ende Reynold , onsen zoen , Herman van Covorden , voer mi ende Henric , minen zoen , ende Godevart voerscreven voer mi zelve , onze zeghele an desen brief ghehanghen . Ghegheven int jaer ons Heren dusent drie + hondert een ende tsoeventich des Dinsdaghes na zente Mertijns dach , als men scrijft Translatio .