Corpus Van Reenen-Mulder (CRM14): Oorkonde G595r37102

@ Allen luden , die desen brief zullen sien of horen lesen , doe wi verstaen , Johan , here van Covorden , Herman van Covorden ende Godevart van den Alden~Have , anders gheheyten van Haren dat wi ghelavet hebben ende ghelaven mit desen brieve in goeden trouwen eersamen heren , den . doemdeken ende capitel ten . Doem tUtrecht , dat wi ofte onse procuratoer van onser weghen ende in onsen naem . die wi des mechtich maken zullen . comen zullen tUtrecht tusschen hier ende Paeschen naestcomende na date des briefs voer den officiael van Utrecht ende enen notarijs ende bekennen aldaer ende belygen openbaerlic , dat wi in pachte ontfanghen hebben van den heren voerscreven alsulke weerlike gherichte ende heerlicheyt , hoghe ende leghe , te Groeninghen ende te Zelewaert mit Wolde ende Gho ende alle hore toebehoren na allen manieren ende voerwaerden alse die brieve begrepen hebben , die wi den heren van den Doem voerscreven daer + op ghegheven hebben , beseghelt mit onsen zeghelen , sprekende van den gherichte ende heerlicheyt voerghenoemt , al arghelist uytghesproken . In orconde des briefs zoe hebben wi onse zeghele aen desen brief ghehanghen . Ghegheven int jaer ons Heren dusent drie + hondert een ende tsoeventich des Donredaghes na zente Mertijns dach , als men scrijft Translacio . dusend drie hondert ende tseventich .