Corpus Van Reenen-Mulder (CRM14): Oorkonde G640r34701

Wy johan van vreden / Steuen noertbeke / doet verstaen allen luden in desen breue / dat wy mit vulboert aller onser rechten eruent hebt vercoft / henrike den kalen / jutten sinen echten wiue / en_ al oren rechten erfghenamen die horstincstede die gheleghen is in den dorpe tot vlzen / om ene Su_me van ghelde die ons wal betaelt is / daer neghenes rechtes meer an te wachtene / ende hevet die / henrike vorscreuen jutten sinen wiue en_ oren rechten erfghenamen vp~ghedraghen / in hant Otten van der schilt die to der tijt een ghesworen richter was des greuen van benthem in enen rechten heghe richte / en_ der vorghenoemde stede sole wy eme waren vor al die ghene die des to rechte comen willen / alle arghelist vut~ghesproken / vp~dat dit stede ende vast si / en_ in mere vestenisse deser vorscreuenre dinc / so heb ic johan van vreden vorghenoemt vor Steuene vorghenoemt als vor eme want hi seluen gheen seghel en hadde ende vor mi desen breef bezeghelt mit minen zeghele / Ghegheuen jnt jaer ons heren dusent dre + hundert zeuene ende viertich des donredaghes na palme~daghe . .