Corpus Van Reenen-Mulder (CRM14): Oorkonde G697r36801

Jch johan van beuervorde willam en_ johan mine zone en_ voert al vnse erfghenamen doet kundich allen luden de dezen breef zolen zeen of horen lezen . en_ tughet openbare dat wij eendrachtlike med vnsen vryen willen hebbet vorkoft en_ vorkopet med dezen breue tod eynen staden erfkope Euerde hughinc en_ zinen rechten eruende dat goet tor Eze dat wij daer an hebbet med aller Slachter not en_ med al zinen rechten tobehoerne alzo alze dat g˚ed n˚ vnse was en_ alzet beleghen is in den kerspele van risne en_ in der burscap tod enthere . em en_ zinen eruende erflike to bezittene vmme eyne Su_me van ghelde de vns van em wal betaelt is . en_ hebbet em dat vors_ g˚ed vp~ghedraghen en_ vorteghen voer een recht vry eyghen g˚ed vor den gherichte van risne alze vor kope ton haue de to der tijt daer eyn ghesworen richt_ was . daer he zat in eynen ghehegheden heymale alze wij med rechte zolden en_ bekennet dat wij noch vnse eruende an den vors_ guede nyerhande recht meer en hebbet noch wachtende en zint vortmeer zole wij en_ vnse eruende Euerde vors_ en_ zinen eruende des vors_ guedes ter Eze alze dat vnze was . do wij em dat vorkoften waren voer eyn recht vry eyghen tod alle_ tiden waer ze des to doene hebbet voer alle de ghene de des to rechte komen willet Oeck zint vorwarde de dre mudde rogghen de wij arnoldus den Coster van almelo vyt den vors_ guede jaerlix erflike vorkoft hadden de zal Euerd vors_ en_ zijn eruend_ jaerlix vyt~gheuen en_ betalen van den vors_ guede . den Papen van risne en_ anderen papen de daer breue vp hebbet alzo alze wij de betale_ zolden . alle deze vorwarde vors_ hebbe wij ghelouet en_ aen gueden trouwen ghe~zekert Euerde vors_ en_ zinen eruende stede en_ vast to holdene al arghelist vyt~ghesproken jn orkunde dezer dinc hebbe wij johan willam en_ johan vors_ vnse zeghele an dezen breef ghehanghen vor vns en_ vor alle vnse eruende . en_ vmme eenre meerre vestnisse wille zo hebbe wij ghebeden kope den richter van risne vors_ dezen breef mede ouer vns to bezeghelne en_ ich koep vors_ wante al deze dinc vors_ voer mi ghescheen zin daer ich zat to richte in eynen hegheden heymale en_ daer ich mijn orkunde vp vntfenc zo hebbe ich vmme bede willen van beyden Syden mijn zeghel mede an dezen breef ghehanghen ghegheuen jnt jaer vns h_en dusent dre hundert achte en_ Sestich vp Sunte Aghaten dach eyner heylighen juncfrouwen