Corpus Van Reenen-Mulder (CRM14): Oorkonde G697r37701

Wy Euerd van langhen . alebe myn echte wijf . ende Godert onse sone . doen kundich allen luden ende betughen openbare med desen apenen breue . dat wy redelike ende rechtelike hebbet vorcoft en_ vorcopet med dessen breue stedes eruecopes . hern Otten van Schaghehorne . kercher to losser ende vicarius to Rysnen . ende sinen hantghetruwen . of we holder is desses breues med oren willen . eyn molt gudes wint_rogghen bij aldensaler marketmathe iaerliker gulde . vyt vnsen twen guden ende eruen . alse vyt den groten bedinch . ende vyt der thohorst gheleghen in den kerspele van Rysnen to hebbene en_ to besittene erflike ende vmmermer vmme eyne Summe gheldes de ons van heren Otten vorghenomt witlike ende wal betalet is . ende hebben daer vp vorteghen vor Cope ton houe richter to der tiit to Rysnen daer he sat in eynen ghehegeden heymale med allen vortichnissen en_ vplatinghen alse wy med rechte solden . welic molt rogghen vorscreuen wy ende onse eruende solen hern Otten vorghenomt . ende sinen hantghetruwen . of we holder is dese brefs med oren willen . dat vorghenomde molt rogghen alle iaer betalen . vp vnse cost . sunder oren schaden . binnen der dekenye van twenthe waer em des ghenoghet . tusschen Sunte Michele ende Sunte Mertene in den wintere . werd dat wy des nicht en deden so mach her Otte vorghenomt of sine hantghetruwen . of we holder is deses breues . dat vorghenomde molt rogghen vytwinnen of vytpenden vyt den vorghenomden twen guden . med ghestliken rechte of med werliken rechte vnvoruolghet ende vnvorclaghet . sunder onsen Ouelenmoet vortmer werd dat de twe gude vorscreuen . vorledeghden of vorwoesteden dat god vorbeden mote . so mach her Otte vorghenomt of sine hantghetruwen . of we holder is deses breues med oren willen . dat vorghenomde molt rogghen . vytwinnen of vtpenden . vyt alle onsen anderen guden ende eruen waer wy de hebben . med ghestliken rechte of med werliken rechte weliker se willet sunder onsen ouelenmoet . vnvoruolghet of vnvorclaghet . ende bidden alle richtene med desen breue ghestlich ende werlic . wanner her Otte vorghenomt of sine hantghetruwen of holder deses breues med oren willen . des van em begherne sint dat se em de pendinghe willen helpen doen alse vorscreuen is . vortmer so sole wy hern Otten vorghenomt ende sinen hantghetruwen of helder deses breues med oren willen . dat vorghenomde molt rogghen vorholden in rechter leenscher wer sunder oren schaden . vortmer so hebbe wy ghelouet ende louet vastlike in dessen openen breue dat wy ende vnse eruende solen hern Otten vorghenomt ende sinen hantghetruwen of holder deses breues med oren willen . des vorghenomden molt rogghen rechte waerschap doen wo men eruecopes to rechte waren sal vor alle de ghene de des ton rechte comen willet . Alle arghelist in dessen breue vytghesproken . jn orkunde deser dinc so hebbic Euert vorghenomt myn seghel an desen breef ghehanghen . vor my vor aleben myn echte wijf vor Goderde onsen sone vorghenomt ende vor vnse rechten eruende . ende tod eyner merren verstnisse so hebbe wy vort ghebeden . Cope ton houe den richter vorghenomt dat he dessen breef mede ouer ons beseghelen wolde med sinen seghele . ende ic Coep richter vorghenomt want alle desse dinch vor my ghescheen sint daer ic sat in eynen ghehegheden heymale daer ic mynen orkund vp vntfengh . so hebbic vmme bede willen van beyden Siden myn seghel mede an desen breef ghehanghen . daer med my an ende ouer weren alse rechte kornothen ende gherichtslude . Berner van eghen johan bertrams . ende alse ouerlude . Euerd buseman . her johan de kerchere van rysen Ecbert wandaghes berendes knecht van Sudena ende anders guder lude ghenoech . Ghegheuen int jaer onses heren dusend dre + hundert Seuen ende Seuentich des dinxdag_ na Sunte Paulus . dach alse men Scriuet conu_sio pauli