Corpus Van Reenen-Mulder (CRM14): Oorkonde H036p30901

WJE . . Scepenen ende ghemeentucht van + der stede van brucghe / doen te wetene allen den ghenen die dese letteren zullen zien jof horen lesen dat wie omme de nood van onser stede van brucghe hebben v_cocht onsen lieuen vrienden / Maergrieten zeghers dochter huter lane bi auesoeten van + den moere / zegheren huter lane / en_ pieterkine sine? keefskinde / dat hi hadde bi Marien joesceps zeuen + pond vlaemsche jaerlixer renten te haerre drier liue omme ene benaemde somme van peneghen / die zie ons van haren propren cateilen in goeden ghereeden peneghen wel ende vulcomenlike hebben vergolden / ende die wie van hemlieden hebben ontfanghen / en_ bekeerd in die ope_bare nutscepe ende orebare van onser voerseider stede van brucghe Dewelke zeuen pond vlaemsche jaerlixer renten wie belouen alle en_ elc zonderlanghe van ons allen ou_al in goeder trouwen dat wie + se Maergrieten zegheren en_ pieterkine vorseid jof enighen van hem drien die lanxt leuen zal jof haren zekeren bode jof den bode van enighen van hem drien die lanxt leuen zal zullen ghelden jof doen ghelden bin + der stede van brucghe elkes jaers also langhe als zie leuen jof enich van hem drien leuet te tween paiementen euen + groten in deser maniere Dats te + wetene / dat Maergriete voerseid alleene te haren liue / jof haer zeker bode voren heffen en_ ontfanghen sal de zeuen pond siaers voerseid / de ene helt jn karst~daghe die eerst coomt na + der date van desen letteren / ende dander helt jn sinte jans baptists daghe daer naer eerst comende mids~zomers En_ dat naer Maergriten liue voerseid / die voerseide zeghere ende pieterkijn jof hare zekere boden / heffen zullen ende ontfanghen / de voersei?e zeuen pond vlaemsche jaerlixer renten jn effenliken deelen ten tween voerseiden terminen en_ paiementen / ende welc van zegheren ende pieterkine voerseid die andren v_leuet / dat hi de voerseide zeuen pond vlaemsche jaerlixer renten heffen zal ende ontfanghen al gheheel te sinen liue . Ende in deser voerseider maniere / zo zullen wie ghelden jof doen ghelden dese voerseide zeuen pond vlaemsche jaerlixer renten elkes jaers van jare te jare / also langhe / alse Maergriete / zeghere ende pieterkijn voerseid / jof enich va_ hemlieden lijf hebben in haren lachamen / jn so wat state van leuene dat zie zijn / en_ in zo wat abite / en_ zo waer dat zi hem bekeeren en_ betrecken / es het in religioene jof ter werelt ten tween voerseiden terminen en_ paiementen . Ende tenden haren liuen als zie alle drie dood worden / zo zullen wie zijn quite los ende ledich van + den voerseiden zeuen ponden vlaemsche jaerlixer renten te gheldene tieghen / Maergrieten / zegers en_ pieterkijns hoir voerseid / en_ tieghen elken andren mensche . Ende alle dese voerseide dinghen / en_ elke zonderlanghe zo belouen wie alle en_ elc zonderlanghe van ons allen ouer al / dat wie + se / Maergrieten / zegheren ende pieterkine voerseid / zullen houden / en_ doen houden wel en_ ghetrouwelike / en_ dat wiere ons in gheere maniere tieghen zullen zetten / omme eneghe dinc die gheuallen zi / jof die gheuallen moghen / Ende hier toe zo binden wi ons allen / ende elken zonderlanghe van ons allen / ende alle de ghone die na ons comen zullen . . Scepenen en_ ghemeentucht van + der voerseider stede van brucghe . Ende renuntieren oec als hier toe / tallen priuilegien en_ jndulgentien / gheimpetreert en_ timpetreerne / tallen rechten beede bescreuen en_ onghescreuen van + der heligher kerke ende van + der werelt / tallen letteren voersten ende gratien van so wien dat zi ghegheuen zijn / jof ghegheuen moghen worden / Es het van + den paues van rome / jof van + den coninc van vrankerike / jof van enighen andren prense / en_ tallen andren voerdeelen / die ons ende onser voerseider stede van brucghe mochten comen te helpen ende te baten / ende maergrieten jof zegheren jof pieterkine / jof haren bode voerseid te deren en_ te scaden / Ende omme~dat wie willen dat dese dinc zi vast en_ ghestade / zo hebben wie . . scepenen voerseid jn orconscepen van + der~welker dinc dese huuthanghende letteren ghedaen zeghelen metter stede zeghele van brucghe / Dit was ghedae_ jnt jaer ons heren als men screef van sinen jncarnatione / Dusentich Drie + honderd + ende Neghene / jn die maend van septembre .