Corpus Van Reenen-Mulder (CRM14): Oorkonde H036p30903

WJE . . Scepenen ende ghemeentucht van + der stede van brucghe / doen te wetene allen den ghenen die dese letteren zullen zien jof horen lesen / dat wie omme de nood van onser stede van brucghe hebben vercocht onsen lieuen vrienden heilsoeten van huutkerken / en_ grielen haerre docht_ die soe hadde bi jacob beyne vijf pond vlaemsche jaerlixer renten te haerre beeder liue omme ene benaemde somme van peneghen die zie ons van haren propren cateilen in goeden ghereeden peneghen wel ende vulcomenlike hebben vergolden / ende die wie van hemlieden hebben ontfanghen / ende bekeerd in die openbare nutscepe ende orebare van onser voerseider stede van brucghe . De~welke vijf pond vlaemsche jaerlixer renten wie beloue_ alle / ende elc zonderlanghe van ons allen ouer al in goeder trouwen / dat wi + se heilsoeten / ende grielen haerre dochter voerseid / jof enighen van hem beeden die lanxt leuen zal / jof haren zekeren bode jof den bode van enighen van hem beeden die lanxt leuen zal zullen ghelden jof doen ghelden bin + der stede van brucghe elkes jaers also langhe als zie leuen / jof enich van hem beeden leuet te tween paiementen euen + groten dats te wetene vichtich schelighe vlaemsche jn sinte jans baptists daghe mids~zomers die eerst coomt na + der date van desen letteren / en_ vichtich scelighe vlaemsche jn kerst~daghe daer naer eerst comende / Ende also die voerseide vijf pond vlaemsche jaerlixer renten elkes jaers van jare te jare / also langhe / alse heilsoete en_ griele voerseid lijf hebben in haren lachame / jn so wat state van leuene dat zi sijn en_ in so wat abite / en_ so waer dat sie hem bekeeren en_ betrecken es het in religione jof ter werelt / ten tween voerseiden terminen en_ paiementen / Ende tenden haren liuen als zie beede dood worden / zo zullen wie zijn quite los ende ledich van dien voerseiden vijf ponden vlaemsche jaerlixer renten te gheldene tieghen heilsoete_ en_ grielen hoir voerseid en_ tieghen elken andren mensche . Ende alle dese voerseide dinghen / ende elke zonderlanghe zo belouen wie alle / en_ elc zonderlanghe van ons allen ouer al dat wi + se heilsoeten / ende grielen voerseid zullen houden wel ende ghetrouwelike en_ doen houden en_ dat wiere ons in ghere maniere tieghen zullen zetten / omme enighe dinc die gheuallen zi jof die gheuallen moghen . Ende hier toe so binden wi ons allen / en_ elken zonderlanghe van ons allen / ende alle deghene die na ons comen zullen / . . Scepenen ende ghemeentucht van + der voer~seider stede van brucghe / Ende renuntieren oec als hier toe tallen priuilegien ende indulgentien gheimpetrert ende timpetrerne / tallen rechten beede bescreuen en_ onghescreuen van + der heligher kerke / ende van + der wereld / tallen letteren voersten en_ gratien van so wien dat zi ghegheuen zijn jof ghegheuen moghen worden / Es het van + den . . paues van rome / jof van + den . . Coninc van vrankerike / jof van enighe_ andren prense / en_ tallen andren voerdeelen die ons ende onser voerseider stede van brucghe mochten comen te helpen ende te baten / ende heilsoeten jof grielen / jof haren bode voerseid te deren en_ te scaden . Ende omme~dat dese dinc zi vast en_ ghestade / so hebben wie scepenen voerseid jn orconscepen van + der~welker dinc / dese huuthanghende letteren ghedaen zeghelen metter stede zeghele van brucghe . Dit was ghedaen jnt jaer ons heren als men screef van sinen jncarnatione / Dusentich / Drie + hondert ende Neghene / jn de maend van septembre .