Corpus Van Reenen-Mulder (CRM14): Oorkonde H036p31001

WJE . . Schepenen ende ghemeentucht van + der stede van brucghe doen te wetene allen den ghenen die dese lett_en zullen zien ende horen lesen / dat wie omme de nood van onser stede van brucghe hebben v_cocht onsen lieuen vrienden Celien jacob bonins dochter nonne van + den bussche bi ghent bi marien sinen wiue / Ende janne ende katelinen loys kinde van cassele bi marien sinen wiue / drie pond ende tien scheelghe vlaemsche jaerlixer renten te haerre drier liue / omme ene benaemde somme van peneghen die zie ons van haren propren cateilen in goeden ghereeden peneghen wel ende vulcomenlike hebben v_golden / en_ die wie van hemlieden hebben ontfanghen ende bekeerd jn die openbare nutscepe ende orebare van onser voerseider stede van brucghe . De~welke drie pond ende tien scheelghe vlaemsche jaerlixer renten wie belouen alle ende elc zonderlanghe van ons allen ouer al in goeder trouwen dat wie + se Celien janne en_ katelinen vorseid jof enighen van hem drien die lanxt leuen zal / jof haren zekeren bode jof den bode van enighen van hem drien die lanxt leuen zal zullen ghelden jof doen ghelden bin + der stede van brucghe elkes jaers also langhe als zie leuen jof enich van hem drien leuet al gheheellike te tween paiementen euen + groten / jn deser maniere / dats te wetene / dat Celie voerseid alleene te haren liue / jof haer seker bode voren heffen ende ontfanghen sal de drie pond en_ tien scheelghe siaers voerseid / de ene helt jn sinte jans baptists daghe mids~zom_s / die eerst coemt na + der date van desen lett_en / Ende + dander helt jn kers~daghe daer naer eerst comende . En_ dat na celien liue voerseid / jan en_ kateline hare zekere boden heffen zullen en_ ontfanghen de voers_ drie pond en_ tien scheelghe vlaemsche jaerlixer renten jn effenliken deelen ten tween voerseiden terminen en_ paieme_ten . Ende welc van janne en_ katelinen voers_ die andern v_leuet / dat hi die voerseide drie pond en_ tien scheelghe vlaemsche jaerlix_ renten heffen sal ende ontfanghe_ al gheheel te sinen liue . Ende in deser voerseider maniere zo zullen wie ghelden jof doen ghelden dese voers_ drie pond en_ tien scheelghe vlaemsche jaerlixer renten elkes jaers van jare te jare also langhe alse Celie / Jan en_ kateline jof enich va_ hem~lieden voerseid / lijf hebben in haren lachamen jn zo wat state van leuene dat zie zijn en_ in + zo wat abite / en_ zo waer dat zi hem bekeeren en_ betrecken / es het in religione af ter werelt / ten tween voerseiden terminen ende paiementen . Ende tenden haren liue als zie alle drie dood worden / zo zullen wie sijn quite los en_ ledich van dien voerseiden drien ponden en_ tien scheelghen vlaemsche jaerlix_ renten te gheldene tieghe_ Celien / jans en_ katelijnen hoir voers_ en_ tieghen elken andren mensche . Ende alle dese voerseide dinghe en_ elke zonderlanghe zo belouen wie alle / en_ elc zonderlanghe va_ ons allen ouer + al / dat wie + se Celien janne ende katelinen voerseid zullen houden en_ doen houden wel en_ ghetrouwelike / en_ dat wiere ons in ghere maniere tieghen zullen zette_ omme enighe dinc die gheuallen zi / jof die gheuallen moghen . En_ hier toe so binden wi ons allen en_ elken zonderlanghe van ons allen / en_ alle de ghone die na ons comen zullen . . Schepen_ en_ ghemeentucht van + der voerseider stede van brucghe . Ende renuntieren oec als hier toe tallen priuilegien / ende jndulgentien gheimpetrert en_ timpetrerne / tallen rechten beede bescreuen ende onghescreuen van + der heligher kerke en_ van + der werelt / tallen letteren voersten en_ gratien van zo wien dat zi ghegheuen zijn jof ghegheuen moghen worden . Es het van + den . . Paues van rome jof van + den . . Coninc van vrankerike / jof van enighen andren prinse / Ende tallen andren voerdeelen / die ons ende onser voerseider stede van brucghe mochten comen te helpen ende te baten / ende Celien / janne jof katelinen / jof haren bode voerseid te deren ente scaden . Ende omme~dat wie willen dat dese dinc zi vast en_ ghestade / zo hebben wie . . Scepenen voerseid jn orconscepen van + der~welker dinc dese letteren huuthanghende ghedaen zeghelen met + ter stede zeghele van brucghe Dit was ghedaen jnt jaer ons heren als men screef van sinen jncarnatione Dusentich / Drie + hondert / ende tiene / svrindaghes voer sinte luucs dach ewangelists / jn de maend van octobre .