Corpus Van Reenen-Mulder (CRM14): Oorkonde H036p34102

WJE zegher tholnare Pieter van zevencoten Jan hoste f_ s_ Jans Jan Minne Ende Joes gaderpenninc scepenen jn brucghe te dien tiden dat deze dinghen vor ons waren ghedaen doen te + wetene allen den ghuenen die dese lettren sullen sien jof horen lesen dat cam vor ons alse vor scepenen de_ pieter van ghent f_ s_ pietermans van ghent prochipape van sinte katelinen bi brucghe Ende gaf halm Ende wettelike ghifte janne den Cueninc den dobberre van zes sceleghen groten tornoysen Eweliker Ende Erueliker Renten Elkes jaers ligghende ten hoye an husinghen Ende an lande die wilen waren s_ pietermans van ghent s_ pieters van ghent vorseid vader wilen was an die zuudzide van + der strate naest jans van melsine huse af een side Ende jacobs van bethoud husinghen wilen waren af ander side Ende de_ pieter van ghent f_ s_ pieterman? van ghent vorseid wedde Ende belouede den vorseiden janne den Cueninc den dobberre deze vorseide zes sceleghe groter tornoyse Eweliker Ende Erueliker Renten Elkes jaers ligghende ter vorseider stede ghelijc Ende in der manieren dat vorseid es te wetten te waerne Ende te waranderne te jans cueninx sdobberes vorseid vrijen Eghindome tieghen Elken meinsche Jn kennessen van dezen dinghen hebben wie scepen_ vorseid dese lettren bezeghelt vuthanghende met onsen zeghelen dit was ghedaen jnt Jaer ons h_en alse men screef dusentich drie hondert Een en_ viertich vpten vier en_ twintichsten dach van April - - - - -