Corpus Van Reenen-Mulder (CRM14): Oorkonde H036p35101

Ic . . Broeder . Gillis de buc . . Meester van den hospitale van Sinte janz huus jn Brucghe jn dien tiden / doen te wetene alle_ lieden / dat ic hebbe ontfanghe_ / van . . Broeder janne van beuerhoud / vpper~meester . en_ van Broeder wout_ van orscamp onder~Meester van den becgaerden in Brucghe te dien tiden / drie pond Groter torn_ / de~welke Joncvrouwe lisebette van langhedonc ordenerde / sette / en_ gaf / o_me viertich sceleghe paris_ Erueliker Renten sjaers der mede te copene / jn mersinghe_ / in beteringhe_ / en_ in Augmentacien van der mere Capelrie behorende int hospitael van sinte Janz huus vors_ / ouer de ziele van den h_e lieuinne van langhedonc wile_ was de mere Capellae_ int hospitael vors_ / de~welke vorseide viertich sceleghe paris_ erueliker Rente_ sjaers . jc hebbe belooft en_ beloue / als Meester ou_ mi / en_ ou_ alle de ghuene die na mi Meest_s van den hospitale vors_ come_ en_ wesen zulle_ / en_ ou_ tvorseide hospitael / de_ mere Capellae_ behorende int hospitael vors_ te gheldene en_ te betaelne elkes jaers ewelike vord~an gheduerende te alsulker t_mine / als men sine and_e Rente jaerleex pleghet te gheldene sonder fraude fute / noch enich malengien / Vord hebbic belooft en_ beloue als meester van den hospitale vors_ / den vorseiden broeder janne / en_ broeder wout_e vors_ bede Meesters van den vors_ becgaerden scadeloos te houdene en_ al scadeloos te quitene jeghe_ elken meinssche die hem van + den drien ponde_ grot_ torn_ hiet eessche_ af calengieren mochte_ . . Jn orconscepe der waereide / hebbic als meester van + den hospitale vors_ dese l_ren vuthanghe_de bezeghelt met minen zeghele . Dit was ghedaen in tjaer onz heren als men screef . M˚ . + ccc˚ . + en_ vichtich vp den Niewe~dagh ; -