Corpus Van Reenen-Mulder (CRM14): Oorkonde H036p35103

WJE piet_ van hoostburch ende pieter bonin f_s lambrechtz scepene_ . jn brucghe in dien tiden dat dese dinghen vor ons waren ghedaen doen te wetene allen den ghuenen die dese lettren sullen zien jof horen lesen dat cam vor ons als vor Scepenen diederic van berneem ende kennede ende verlijede dat hie ontfanghen heuet van clais aluerdoe . als maenre van den weue~hambochte ende van den vullehambochte jn brucghe in dien tiden twintich sceleghe groter tornoise jn minderinghen ende jn Rebate van der scult die thambocht van den weuers vorseit . den vorseiden diedericke van berneem . sculdich ende tachter es . van den~welken vorseiden twintich sceleghen grote tornoisen dat hem diederic van berneem vorseit wel ghepait hilt ende clais aluerdoene . ende tambocht van den weuers vors_ . der of quite scalt . jn kennessen van desen dinghen zo hebben wie Scepenen vorseit dese lettren bezeghelt met onsen zeghelen vuthanghende dit was ghedaen vpten zestiensten dach van sporkele anno d_m___ M˚ ccc˚ ende vichtich - - -