Corpus Van Reenen-Mulder (CRM14): Oorkonde H036p36102

WIE pieter de scuetelare ende diederic de clerc scep_ne jn brucghe in dien tiden dat dese dinghen vor ons waren ghedaen doen te wetene allen den ghuenen die dese l_ren zullen zien iof horen lesen dat cam vor ons als vor Scep_nen ver adelise clais scauers weduwe als die ghuene die bleuen es in allen jnsculden jn allen vutsculden ende jn al tgoet dat bleuen es bachten claise den scauere vors_ haren man wilen was Ende gaf halme ende wettelike ghifte broeder Symoen tholphine als meester van den becgaerden in brucghe in dien tiden ende gillisse f_ heinrix die men heet cruucken ende janne den scauere den houden als vogheden van den hospitale van onser vrauwen te nasareth in brucghe in dien tiden . te katelinen bouf wouters dochter van zeuencote ende te lisebetten bouf pauwels dochter van zeuencote de~welke aldaer vor hoghen stonden ende in presente om_e der vorseider katelinen ende lisebetten ende elleuene scamele_ vrauwen metgaders hemlieden der in te wonene ende der in te habyterne ewelike gheduerende ende dese vrauwen te kiesene ende te nemene daert desen vorseiden broeder symoene gillis f_ heinrix ende jan den scauere ende den ghuenen die naer hemlieden meest_ van den becgaerden ende vogheden van den vorseiden hospitale goet zal dijnken . van enen huus met al + datter voren bachten ende an elke zide toe + behort staende in de gansstrate an de westzide van der strate naest bouden Roodchaerds huse wilen was af een zide ende joncvrauwe jehanen akets huus wilen was af ander zide vp s_e symoens land van aertrike wilen was ende der andre diere toe + behoren Ende ver adelise clais scauers weduwe vorseit wedde ende belouede broeder symoen tholphine als meester van den becgaerden vorseit ende gillis f_ heinrix ende janne den scauere vorseit als vogheden van den vorseiden hospitale van nazareth te katelinen ende te lisebetten ende ter aermer vrauwen bouf vorseit dit vorseide huus met al + datter toe + behort staende ter vorseider stede ghelijc dat vorseit es te wetten te waerne ende te waranderne met al + datter voren bachten ende an elke zide toe + behort ende ertvast ende nagheluast der an es te katelinen te lisebetten ende ter elleuene aermer vrauwen met hemlieden vorseit vryen eghindome tieghen elken meinsche met zestiene sceleghe paris_ siaers ten Rechten landcheinse Ende hier bij zo es te wetene dat ver adelise vorseit hebben zal ende behouden jn haren handen ende wonen in dit vorseide huus ende datter toe + behort alse langhe als zoe leuen zal behouden dies dat ver adelise vorseit jaerlix ghelden zal ende betalen den landcheins die jaerlix gaet vte den vorseiden huus ghelijc dat vorseit es ende tvorseide huus houden staende ghehaefdich tieghen wijnt ende tieghen water vp haren cost also langhe als zoe leuen zal . alsoot vorseit es Ende kateline ende lisebette vorseit ouer hemlieden ende ouer de elleuene aerme vrauwen die met hemlieden dit vorseide huus bezitten zullen ende der jn wonen zulle_ ende ouer al haerlieder naercomers wedden ende beloueden dit vorseide huus met al + datter voren bachten ende an elke zide toe + behort staende ter vorseider stede alsoot vorseit es ghehaefdich te houden staende van weghe ende van dake tieghen wiint en_ tieghen water ende altoos betren ende niet aerghen ende de vorseide zestiene sceleghe paris_ die jaerlix gaen vte den vorseiden huus ende datter toe + behort ten Rechten landcheinse te gheldene ende te betaelne vp haerlieder cost naer der doot van ver adelisen vorseit ewelike tallen daghen gheduerende zonder fraude ende enich malengien jn kennessen van desen dinghen zo hebben wie scep_ne vorseit dese l_ren bezeghelt met onsen zeghelen vuthanghende dit was ghedaen vpten zesse ende twintichsten dach van wedemaent anno d_ni M ccc een ende tsestich - -