Corpus Van Reenen-Mulder (CRM14): Oorkonde H036p37301

Wie Jnghelram de bakere ende Jan van ypre ScepeneN in brucghe in dien tiden dat dese dinghen voor ons waren ghedaen doen te wetene allen den ghuenen die dese l_ren sullen zien iof horen lesen . dat camen voor ons als voor scepenen Jan been de cupere ende kateline sijn wijf Ende besetten ouer hemlieden ende ouer haerlieder naercommers Joncvrauwe katelinen nachtegaels der begine ende haren naercommers vp een huus met Eere plaetche lands der bachten an leghende staende ieghen twesthende van sinte gillis kerke vpten houc van enen clenen straetkine . naesten pauwels smeids huus scupers af een zide ende den cleinen straetkine vorseid af ander zide . vp s_e Jans land van rudderuoorde wilen was met sestiene peneghe inghelsche hute den vorseiden huus ende plaetche lands elkes Jaers gaende ten rechten landcheinse metgaders enen huus ende eere plaetche lands staende neffens desen vorseiden huus toebehorende pauwelse den smit vorseid Als ouer drie sceleghen ende viere peneghen groten tornoisen Eweliker Renten elkes Jaers bouen den vorseiden landcheinse iof de werde der ouer in andren payemente . Te gheldene ende te betaelne dese vorseide Ewelike rente ten tween terminen binnen den Jare dat es te wetene twijntich groten tornoisen te medewijntre nu eerst co_mende ende twijntich groten tornoisen te sinte Jans messe mids~zomers daer naer eerst co_mende . Ende also voord telken medewijntre ende telken sinte Jans messe in elc Jaer daer naer volghende te gheldene ende te betaelne twijntich groten tornoisen Ewelike tallen daghen ghedurende Ende ghebrake an dese vorseide besettinghe yet dat zoe bedoorue iof te nieuten ghinghe waerd bi brande iof bi andren saken in so wat manieren ende condicien dat het mochte sijn ende zoe der vorseider drie sceleghen ende viere peneghen groten tornoisen Eweliker renten elkes Jaers bouen den vorseiden landcheinse niet werdich en ware Te gheldene ende te betaelne telker vorseider t_mine ghelijc alst vorseid es . dat wedden aldaer ende beloueden Jan been ende kateline vorseid ouer hemlieden ende ouer haerlieder naerco_mers der vorseider Joncvrauwe katelinen nachtegaels ende haren naercommers dat voord te vulco_mene ende te vuldoene vp haerlieder lijf ende vp alt goed dat sij hebben . Ende voord tvorseide huus met datter toebehoord te houdene staende ghehaefdich ende wel te gherics van weeghen van dake ieghen wijnd ende water altoos te beterne ende niet te aerghene ende der vorseider Eweliker renten elkes jaers bouen den vorseiden landcheinse Ewelike tallen daghen werdich te houdene ghelijc ende in + der manieren dat vorseid es sonder fraude ende malengien . Jn kennessen van desen dinghen hebben wij scepenen vorseid dese l_ren huuthanghende beseghelt met onsen zeghelen dit was ghedaen jnt jaer ons heren . M + . CCC + . drie ende tseuentich vpten dartiensten dach van hoymaend -