Corpus Van Reenen-Mulder (CRM14): Oorkonde H036p37303

Wie jacob de visch . . Ende Roeland puppe scepenen . . in Brucghe in dien tiden doen te wetene allen den ghuenen die dese letteren zullen zien af horen lesen dat . . Camen voor ons alse voor scepenen . willem de meyere ver lysebette zijn wijf wedden ende beloueden ouer hemlieden ende ouer haerlieder naercomers . broeder pieter den weesen vppermeesters van den couente van den begaerden in brucghe in dien tiden broeder jacob van ghistele onder~meester van den voorseiden couente ten zeluen tiden hemlieden ende allen den ghuenen die meesters van den voorseiden couente . naer hemlieden wesen zullen . ende tvorseide couent scadeloos te houdene ende al scadeloos te quitene . ewelike te allen daghen . jeghen elken meinssche als van allen den landcheinse de~welke jaerlijcx gaen mach hute viue cameren te~gadere staende bachten leffinghe~muere / neffens pieter haluerix huse de~welke viue cameren wilen waren andries van bochaen . . ende willem brantine . . Jn kennessen van desen dinghen hebben wie scepenen . voorseid dese l_ren huuthanghende bezeghelt met onsen zeghelen dit was ghedaen int jaer . M + . ccc˚ drie ende tseuentich vpten . . zestiensten dach van december -