Corpus Van Reenen-Mulder (CRM14): Oorkonde H036p37501

WJE . Joris van Aertrike . Jacob metten eye tsher Jacobs zuene . . Jacob mommaerd / Hughe van Moerkerke / Ende pieter de moer ScepeneN Jn brucghe in dien tiden dat dese dinghen vore ons waren ghedaen doen te wetene allen lieden / Dat cam voor ons als voor scepenen vrouwe Adelice tsthoolnaers miins here_ fransois weduwe van haefs~kerke tsrudders ende vrouwe van den brouke / Ende gaf halm ende wettelike ghiften broeder pieter den weeze als meester wezende van den couente van den bagaerden in brucghe in dien tiden tsuorseids couents bouf van zesse ponden viue penighen ende enen hallinc parisisen eweliker ende erueliker Renten elkes Jaers legghende binnen der stede ende scependomme van brucghe in diuersen steden ende paercheelen also hier naer volghet en_ bescreuen staet / Eerst an tland ende an de hofstede daer thuus vp staet bachten sinte claren / dat wilen was hermans van der beke ende nv thoe~behoort Clayse maertein en_ loten zinen wiue zeuene ende vichtich schelighen ende achte penighen par_ daer of dat men ghelt de ene heltscheede telken sinte baefs messe ende de ander heltsceede van den vors_ pen_ telken half maerte in elc jaer Jtem daer bij an tland ende an de hofste daer de husinghen vp staen bi den voorseiden eersten huus de~welke wilen waren jans stalpaerds tshouden en_ nv ziin katelinen van oudenaerde ende der andere diere toe behore_ zeuen ende vichtich schelighen en_ achte penighen par_ daer of dat men jaerlijx ghelt de ene heltsceede telken sinte baefs messe ende de ander heltsceede telken half maerte in elc jaer . Jtem bi sinte jans brucghe an de zuud~zide van der Roye an tland ende an de hofstede daer thuus vp staet dat wilen was / Colaerds tskerseghieters / en_ nv es willems joncheeren . viertiene penighen ende ene_ hallinc par_ de~welke men ghelt te medewintre in elc jaer . Jtem in de oudebuerch an tland ende an de hofstede daer thuus vp staet dat wilen was wouter vladebex en_ nv es jans aengeuiins / drie schelighen ende . Elleuen penighen par_ de~welke men ghelt te medewintre in elc jaer / Ende voort so gaf aldaer vrouwe adelise vors_ halm ende wettelike ghifte den vorseiden meester tsuorseids couents bouf van enen huus staende in den curtrijc~wech an de west~zide van der straten naesten den huus dat men heet cleine~herdsberghe af ene zide ende pieters zwaken huus af ander zide / vp tsabds ende tscouents land van den eechoute / Ende vrouwe adelice tsthoolnaers miins here_ fransois weduwe van aefs~kerke tsrudders ende vrouwe van den brouke vors_ wedde aldaer ende belouede den voorseiden broeder pieter den weeze tsuorseids couents bouf dese voorseide zesse ponden viue penighen en_ enen hallinc par_ erueliker renten elkes jaers / ende dit voorseide huus Met al datter toe + behoert / al staende ende ligghe_de ten vorseiden steden ghelijc en_ in der manieren dat vors_ es / te wetten te waerne ende te warendeerne met al dat den vorseiden huus boven bachten ende an alle_ ziden toe~behoord erduast ende nagheluast der an es / te sinen vryen eyghindo_me tscouents van den bagaerden vors_ tieghen elken meinssche met / achte schelighen par_ ende twee hoeden calx hute den voorseiden huus ende dat daer toe behoord elkes jaers gaende ten Rechten landcheinze Jn kennessen van desen dinghen so hebben wij scepenen vors_ dese lettren huuthanghende bezeghelt met onsen zeghelen dit was ghedaen jnt jaer . M . + ccc . + viue ende tseuentich vp den vichtiensten dach van meye