Corpus Van Reenen-Mulder (CRM14): Oorkonde H036p38201

Wij Buerghmeesters Scepenen ende Raed van + der stede van brucghe . Doen te wetene allen den ghenen die dese lett_en zullen zien af horen lesen dat wij aneziende ende wetende dat dher pieter de moer Ende dher pieter zeghers onse ghesellen in de wet . ghesent hebben ghesiin bi ons om_e beloeuers te zine van + der stede weghe van brucghe van twintich scott_s ende een vout s_ganten ghesent in de poert van ardenburgh om_e die te verwaerne ieghen den ? wille van die van ghend daer zij gheleghen hebben / zesse ende viertich daghe te~gadre ende voort dher pieter vors_ alleene twee + hondert en_ viere en_ vichtich daghe / met alsulken ghesinde alse heml_ toebehoorde ende oorboorlijc was ende ghetrouwelike ghedaen verwarende haerlieder last ter eere van ons_ gheduchten prinche ende ten behoude van zinen lande van vlaendren . Jnt welke de vors_ her pieter costen ghedaen heeft ende tsine grotelike vtegheleit also haerre beeder Rekeninghe te~gadre ende tser pieters Rekeninghe bi hem te vullen verclaersen die zij der of met Tresoriers ghedaen hebben Jn de~welke Rekeninghe / men den her pieter vors_ tachter es van + den vors_ costen bouen dat zij van + der vors_ stede ontfanghen hebben vier waerf twintich pond ende viue scele grote torn_ de~welke som_e van peneghen wij den vors_ her piet_en gheassignert hebben ende bewijst assigneren ende bewisen te heffene ende te ontfanghene metgaders den her zegher honin ende den her vincente van + den moere die int ghelike gheleghen hebben te Curtrike . vp de Rechte heltsceede van + den p_fiten die co_men ende vallen zullen in den handen van + der vorseider stede van + der assise van + den hoppenbiere zo welken tiden dat de scotters der of betaelt zullen wesen van + den assignemente dat heml_ der up ghedaen es . die vors_ heltsceede van + der assise van + den oppenbiere ontfanghende metgaders den her zegher en den her vincente vors_ / elc van hem drien ziin auenant tote der tijt ende der wilen dat hi van + der vorseider som_e van peneghen van zinen vors_ costen betaelt sal wesen . Jn kennessen van welken dinghen / hebben wij dese l_ren huuthanghende beseghelt met + den groten zeghele van + der vors_ stede van brucghe . dit was ghedaen int jaer ons h_en M . + ccc . + een en_ tachtentich vpten eersten dagh van sporkelle - - -