Corpus Van Reenen-Mulder (CRM14): Oorkonde H036p38202

Wie Jacob dommel . Ende pauwels heyns Scepenen Jn brucghe in dien tiden dat dese dinghen voor ons waren ghedaen doen te wetene allen den ghuenen die dese l_ren zullen zien af horen lesen . dat Camen voor ons alse voor scepenen . franse kruke . ende lysebette zijn zijn wijf ende gauen halm ende wettelike ghifte . janne van Rooden ende woutre van Riebeke alse vogheden van claerkine goossin zuermonds kinde dat hie hadde bij lysebetten voorseid zijnen wiue tsuorseids claerkins bouf van vichtiene sceleghen groter torn_ ewelijx cheins elks Jaers . licghende binnen der stede van brucghe . vpte Rechte heltschede van enen huus met al datter voren ende bachten toebehoord staende vpte Reye bij tsconinx~brucghe an de noord~zide van den watre twelk huus wilen was . jan schiets naeste S_e jan helde~bolles huus wilen was af een zide . ende willems huus van zinghene wilen was af ander zide . vp mijns here boudine land van dudzeele wilen was ende der andre diere toe + behoren ende noch vpte Rechte heltschede van enen andren huus . staende bachten desen voorseiden eersten huus . te voorhoofde int ghenthof naesten S_e . jan helde~bolles huus voorseid wilen was af een zide ende . willems huus van zinghene voorseid wilen was af ander zide . Ende franse kruke ende lysebette zijn wijf voorseid wedden ende beloueden den voorseiden vogheden tsuors_ claerkins bouf dese voorseide vichtien sceleghen grot_ torn_ ewelijx cheins elkes jaers licghende ter voorseider stede in der manieren dat voorseid es . te wetten te waerne ende te warendeerne tsuorseids claerkins vryen eghindom_e jeghen elken meinsche de_~welken voorseiden eweliken cheins men ghelt ten tween teerminen binnen den jare dat es te wetene die eene helt telken zinte jans daghe mids~zomers ende dandre helt telken medewintre in elc jaer ewelike te allen daghen gheduerende . Jn kennessen van desen dinghen hebben wie scepenen voorseid dese l_ren huuthanghende bezeghelt met onsen zeghelen dit was ghedaen int jaer . M . + ccc˚ . + drie ende tachtentich vpten zesten dach van april .