Corpus Van Reenen-Mulder (CRM14): Oorkonde H036p38401

Wie Jan heldebolle Ende pauwels heins Scepenen jn brucghe in dien tiden dat dese dinghen vor ons waren ghedaen . doen te wetene allen lieden . dat Cam vor ons als vor scepenen willem scuereul die men heet van steenwille ende scalt quite jacob den heict en_ woutre coopman als tresoriers van + der stede van brucghe te dien tide van al den goede dat zij onder hem en_ in haerlieder handen ghehadt mochten toebehorende janne scuereul svors_ willems scuereuls broeder was ten tiden dat hi leuede / dwelke vors_ goed hemlieden in handen gheleit was ter stede bouf als o_me dat de vors_ jan scuereul bastaerd zoude hebben ghesijn . en_ voord van allen heesschen sculden en_ calaengen tote den daghe van heden co_mende en_ sprutende van + den vors_ goede in zo wat manieren dat het mach zijn zonder fraude en_ zonder malengien . Jn kennessen van desen dinghen hebben wij scepenen vors_ dese l_ren vuthanghende beseghelt met onsen zeghelen . dit was ghedaen int jaer ons heren . M . + CCC . + drie en_ tachtentich vpten zeuentiensten dach van laumaend - -