Corpus Van Reenen-Mulder (CRM14): Oorkonde H069p34301

WJe dancaerd van Ebrouc . Gillis de clappere . Jan vromond . Gillis van scoonhille . Jan nerinc . Gillis f_ gillis van der ramsbeke en_ jan f_ Jans f_ wouters scepenen jnt ambocht van orscamp doen te wetene allen den gonen die dese lettere zullen zien iof horen lesen / dat cam vor ons als vor scepenen lamsin van zweeford de cleerc en_ gaf halme ende wettelike ghifte wille_me van den moere van enen ymete en_ zeuene ende vichtich roeden meersche lands lichteleke meer af min ligghende int ambocht en_ in die prochie van orscamp te viere sticken in steden dat men heet talout / dats te wetene een half ymet ende twee en_ twintich roeden meersche lands lichteleke meer af min ligghende an die noordzide van bouden berbijs meersche lande streckende vp die ryole . en_ noch ene line meersche lands lichtelike meer af min ligghende an die zuudzide neffens willem pachtenbeex meersche streckende neffens der ryole . en_ noch ene halue line meersche lands heet die beke lichteleke meer af min / ligghende an die noordzide an clais vriends meersch . en_ noch viue ende dartich roeden meersche lands lichteleke meer af min ligghende an die west~zide an clais vriends meersch streckende vp die ryole . En_ lamsin van zwefoord vors_ wedde wille_me van + den moere vors_ dit ymet en_ zeuene en_ vichtich roeden meersche lands vors_ te wetten te waerne vri land quite land zuuer land met sire recht_ landscoud ieghen elken me_sche sond_ fute en_ malengien . En_ omme~dat wie scepenen vors_ willen dat dese ghifte en_ dese weddinghe van desen ymete en_ zeuene en_ vichtich roeden meersce lands vors_ vast en_ ghestade en_ wel ghehouden zullen bliuen . so hebben wie scepenen vors_ dese lettere ghezeghelt met onsen zeghelen hute~hanghende . Dit was ghedaen sdonresdaechs na der heligher crucen daghe in pietmaent als men screef ons heren jaer duzentich drie + hondert ende drie ende viertich .