Corpus Van Reenen-Mulder (CRM14): Oorkonde H069p35401

WJE jan vromond / jan nerinc : jan gheraerd / jan roseboom / wouter f_ clais smets / jan jocep / en_ willem lotin / Scepen_ jnt ambocht van Oerscamp Doen te wetene allen den gonen die desen tsaerter zullen zien jof horen lesen / dat Camen voer ons / Martin f_ Carstiaens van der goote en_ margriete sijn wijf / ende gauen halme en_ wetteleke ghifte / willemme den ram den seluer~smet / van den vichtendeele van vijf schelen groten elcx jaers erueleker renten euweleke ende erueleke ghedurende / te gheldene ten tween paymenten binnen elken jare voorseid / Dats te wetene de eene helt van desen voorseiden peneghen / te meye voor de note van den oeste / en_ de ander helt van desen voors_ peneghen te Sente baues messe naer der note van den oeste / binnen elken jare voorseid / en_ also voord te gheldene van jare te jare euwelekee erueleke ghedurende / ende te desen voorseiden daghen elcx jaers / Ende dese voorseide erueleke rente die es beset vp Clais vrients huse en_ hofstede / ende es groot twe linen lands lichteleke mer jof min / ende Noch jn verbeternessen van deser voorseider renten vp twe linen lands vp de houcstrate . Noch vp eene line lands vp pudebrouker~acker Noch vp een vierendeel jmets lands vp den hoolen wech an die oestside van benevoord / Noch vp eene line lands en_ viue en_ twintich roeden lands vp de bvent / bewesten der muelen ten moere / lighende jn die prochie van Oerscamp en_ binnen den ambochte van Oerscamp voorseid / en_ jn die steden die hier voorscreuen staen / Ende martin van der goote en_ margriete sijn wijf voorseide wedden willemme den ram den seluer~smet voorseid / al dese voorseide erueleke rente vp desen voors_ gront / te wetten te ghewaerne jeghen elken mensche sonder fute en_ einighen malengien / Jn kennessen van desen dinghen hebben wie Scepen_ voors_ desen tsaerter te kennessen gheseghelt met onsen zeghelen vuthanghende / Dit was ghedaen jnt jaer ons heren als men screef dusentich drie hondert drie ende vichtich / vp den dartichsten dach van laumaent - - -