Corpus Van Reenen-Mulder (CRM14): Oorkonde H069p35403

WJE jan vromond jan nerinc / jan roseboem / wouter f_ clais smets / jan jocep en_ willem lotin / Scepenen jnt ambocht van Oerscamp Doen te wetene allen den gonen die desen tsaerter zullen zien jof horen lesen / dat Camen voer ons eueraerd van melsvoorde ende kateline f_ Carstiaens van der goote sijn wijf / en_ gauen halme ende wetteleke ghifte / janne colpaerde den zeisenmakere / van den vichtendele van twe en_ twintich jmeten lands onder~land ende merchs~land lichteleke min jof mer / en_ tvichtendeel van allen den husen ende van allen den bomen die staen vp dit voorseide land bede eerd~vast en_ naghel~vast / ligghende ende staende jn die prochie van Oerscamp en_ binnen den ambochte van Oerscamp voorseid / jn eene jeghenode die men heet ten moere ende daer ommetrent / twelke voorseide goet wilen was Carstiaens van der goote seluersmets / Ende eueraerd van melsvoorde voorseid en_ kateline sijn wijf voorseid wedden jan colparde den zeisenmakere voorseid / al dit voorseide land en_ merchs~land / ende alle dese voorseide Cateilen te wetten te ghewaerne jeghen elken mensche / vri land en_ quite land met sire rechter landscoud sonder fute ende enighen malengien / Jn kennessen van desen dinghen hebben wie Scepen_ voorseide desen tsaerter te kennessen gheseghelt met onsen zeghelen vuthanghende Dit was ghedaen jnt jaer ons heren als men screef / Dusentich drie hondert drie ende vichtich vp den achtensten dach van sporkele - - -