Corpus Van Reenen-Mulder (CRM14): Oorkonde H536r33401

Wie heynriic gilles suene hoten suene in seere_ stede vp masiin ambocht in horscamp in die_ tijt dat dese dinghen waren ghedaen en_ gilles die naiere wille_ va_ haerggheem boudene baerbijs boudene paridaen jan wille_ suene va_de_ heecoute boudene boidins suene ysentrude suene weitijn clais smets suene va_ burkelare laten vp masijns ambocht in horscamp doen te wetene alle_ de_ ghoenen die dese lettren sullen sien jof horen lesen dat quamen vor ons alse vor heynricke in seeren stede en_ vor laten vorseit boidiin ondaert~maerc en_ haechte sijn wijf en_ ghauen aline en_ wettelike ghifte paridane va_de_ heecoute stcoue_ts bouf va_de_ baghaerde_ in brugghe va_ heenen ymete lants ligghende te_ hoestende va_ pudebrouc an die suut~side va_der strate dat wilen was liefsten hofstede jtem of suut~alf de_ moerkine vp die hoghe beierestede eene line lants summe va_ dese_ vorseide_ lande so es vier linen lichtelijc meer of min ligghende jn die prochie va_ orscamp en_ va_de_ ambochte vorseit en_ in die stede_ die hier vor~screue staen en_ boidin ondert~maerc en_ aechte sijn wijf vorseit wedde_ vpte_ baerblikeste_ va_ he_ beede_ en_ elc ouer al dit vorseide la_t te wette_ te warne vri lant en_ quite lant met siere rechter lantsult stcouents bouf va_de_ bagherden vrien eghindomme jeghen elken mensce sond_ fute en_ enighen malegien en_ jn kennesse_ va_ dese_ dinghen so ebben wie heynrijc in seeren stede en_ laten vorseit dese lettren gheseghelt met onse_ seghelen vte~anghende dit was ghedaen jnt jaer ons heeren als me_ screef M CCC en_ xxxiiij vp sinte marien magdaleene_ dach -