Corpus Van Reenen-Mulder (CRM14): Oorkonde H536r33501

WJE / veys van scaerdau bailliu van den zieseelschen te dien tiden dat dese dinghen waren ghedaen ende jan van scaerden / wouter hacke / jan van leden / heyneman de vroede / ende lamsin aloud / scepenen jnt ambocht van den zieseelschen ter seluer tijt / doen te wetenne allen den ghuenen die dese lettren Sullen zien jof horen lesen / dat quamen vor ons alse vor bailliu ende vor scepenen vorseit / lamsin de corembitere / michiel van dixmude maergriete Sijn wijf beatrise margrieten suster vorseit / margriete willem vlentaerds weduwe / ende jan van scardau ende lamsin de corembitere voghede van grielekine ende van trijskine willem vlentaerds kinder ende ghauen halme ende wetteleke ghifte / ver celien willems sackers weduwe van der rechter helftsceden van zestiene ymeten lands lettel min jof lettel meer ende van allen den bomen diere vp staen ende van al datter ertvast vp es ende dat den vorseiden lande toe~behort licghende dat vorseide land met al datter toe behort binnen den vorseiden ambochte van den zieseelschen / ende jn de prochie van maldenghem jn steden die men heet ter eneden ende daer otrent dat es te wetenne vichtiene ymete lands lettel min jof lettel meer van desen vorseiden lande / neffens heynemans kinder lande van ossenbrouc of ene side / ende wouters voeghelaers lande of ander Side / ende noch zestich roeden lands lettel min jof lettel meer van desen vorseiden lande licghende jn de ymene mersch neffens willems lande van den plasche of ene Side _ margrieten _ ghertruden blankaerds of ander Side / ende noch zesse ende dartich roeden lands lettel min jof lettel meer van desen vorseiden lande neffens ver ? (onleesbaar) lande vorseit of ene side ende margrieten _ ghertruden blankaerds lande of ander Side ende noch / vichtich roeden lands merschen lettel min jof lettel meer van desen vorseiden lande licghende neffens margrieten _ ghertruden blankaerds lande of ene side / ende arnoud wendelmoeds lande of ander Side / ende noch / ene line lands lettel min jof lettel meer van desen vorseiden lande licghende jn brands hofstede / neffens margrieten _ ghertruden blankaerds lande of ene side / ende arnoud wendelmoets lande of ander Side / ende lamsin de corenbitere / michiel van dixmude / margriete Sijn wijf / beatrise haer suster / margriete willem vlentaerds weduwe / ende jan van scaerdau / ende lamsin de corembitere vorseit alse voghede van den vorseiden kinderen / wedden ver celien willems zackers weduwe vorseit dene helft van desen vorseiden lande met al datter toe behoort te wetten te waerne wech ende land quite land te haeren vrien eghindomme jeghen elken mensche al dit vorseide land als de rechte helftscede van den vorseiden zestiene ymeten lands lettel min jof lettel meer / met tween / sceleghen ende zes peneghen / parisisen elcs jaers te rechter landsculd / ende vort so wedden ende beloueden alle dese vorseide persone / lamsin de corembitere ende alle de andere / ver celien vorseit scadeloos te houdenne ende quite van allen zetinghen ende allen taelgen te allen daghen . jn kennessen van desen dinghen hebben wie bailliu en_ scepenen vors_ dese lettren ghezeghelt met onsen zeghelen vtehanghende / ende jc jan van scaerdau alse scepenne vors_ vp mie seluen / dit was ghedaen vp den zesten dach van maerte jnt jaer ons h_en als men screef . &mring; . ccc˚ . viere ende dartich - -