Corpus Van Reenen-Mulder (CRM14): Oorkonde H536r33502

WIE karstiaen _ heynrics bailliu mijns heren Jans van den gruithuse jnt ambocht van erkenghem jn die tijt dat dese dinghen waeren ghedaen ende pieter _ diederix / jan van der hent / gillis van den dale / karstiaen bloemaerd / willem van den weghe / weytin _ heynrix / ende weytin van der haghe / scepenen / mijns heren jans van den gruithuse vorseit jnt vorseide ambocht ter seluer tijt doen te wetenne allen den ghuenen die dese lettren Sullen zien jof horen lesen / dat quamen vor ons alse vor bailliu ende vor scepenen vorseit / godelief jans wedewe van der haghe ghildolf haer soene jan haer soene / gheertruid haer dochter / heylsoete haer dochter / ende lisebette haer dochter / ende ghauen halme ende wetteleke ghifte / paridane van den ekoute ter becgaerde bouf jn brugghe van zesse ymeten lands lettel min jof lettel meer licghende binnen den vorseiden ambochte van erkenghem ende jn de prochie van orscamp dat es te wetenne twe ymete lands lettel min jof lettel meer van desen vorseiden lande jn de hofstede daer godelief van der haghe jans wedewe van der haghe ende haere kinder vorseit vp woenende Sijn / ende noch vier linen lands lettel min jof meer van desen vorseiden lande jn steden die men heet vpt berghelin / ende noch twe ymete lands lettel min jof meer van desen vorseiden lande jn steden die men heet ten maergelpitte / ende noch twe linen lands lettel min jof meer van desen vorseiden lande ten ende van den bergheline bezuudhalf ouer den wech / ende godelief jans wedewe van der haghe / ghildolf / jan / gheertruid / heylsoete ende lisebette godelieue kinder vorseit / wedden paridane van den ekoute vorseit ten vorseiden becgaerden bouf dit vorseide land te wetten te waerne wech ende land quite land te haeren vrien eghindomme tjeghen elken mensche metter gherechter landscout diere elcs jaers vte gaet / ende daer so quam vor ons bailliu ende scepenen vorseit / paridaen van den ekoute vorseit ende drouch vp wetteleke ende gaf tenen aerueliken chense / godelieue jans wedewe van der haghe ende haeren kinderen vorseit dese vorseide zesse / ymete lands lettel min jof lettel meer / omme drie pond / ende tien sceleghe parisise renten elcs jaers eeuweleke ende aerueleke ghedurende / te gheldenne dene helft van deser vorseider aerueleker renten te sinte martins messe die eerst comen sal / ende de andre helft te meye daer naer eerst comende / ende also voort elcs jaers van jaere te jaere ten vorseiden daghen eeuweleke en_ aerueleke ghedurende / ende dese vorseide aerueleke rente sal ghelden te cope jof te versteruenessen / een pond was alst gheuallet jn kennessen van desen dinghen hebben wie bailliu ende scepenen vorseit dese letteren ghezeghelt met onsen zeghelen vtehanghende / Djt was ghedaen tsdonredaghes naer meyedach jnt jaer ons heren als men screef . &mring; . ccc˚ . viue ende dartich - -