Corpus Van Reenen-Mulder (CRM14): Oorkonde H536r33504

JC heinric gillemans soene oten soens ols here in dien tiden dat dese lettre was ghemaect metgaders Gillise den nayere Pietre maraele Weitine clais soene smeets Boudine paridane Boudine berbize Jhanne willems soene van den echoute ende boudene ysentrude late miins heren tsgrauen van vlaendren up masins Ambocht binnen der prochie van orscamp doen te wetene allen den ghuenen die dese lettre sullen zien of horen lesen dat cam voer ons jacop letteluoet Robrecht van bochout Clais van bochout ende ver griele van den vagheuiere ende gauen halm ende wettelike ghifte Paridane van den echoute tscouents bouf van den beghaerden in brucghe van vieren ymeten lands ende ene line lands lichteliic meer of min licghende onder ghildolfs woeninghe van beuerhout ende daer omtrent binnen der prochie van orscamp ende up masins ambocht voerseit ende in steden dat men heet te pudebrouc Welke voerseide viere ymeten lands ene line lands lichteliic meer of min licghende binnen den Ambochte ende der prochie van orscamp voerseit ende in steden dat men heet pudebrouc voerseit ende daer omtrent voerseit Wedde jacop letteluoet Robrecht van bochout clais van bochout jacop van den boemgaerde ende ver griele van den vagheuiere voerseit paridane van den echoute voerseit tscouents bouf van den begaerden in brucghe te wetten te ghewarendeerne vri land quite land met sire rechter land~scout te sinen vriien eghindoeme sonder fute ende enighen malengien ende omme~dat ic heinric gillemans soene oten soens ols here voerseit metgaders den laten miins heren tsgrauen van vlaendren up masins ambocht voerseit binnen der prochie van orscamp voerseit willen dat al dese voerseide voerwoerden weddinghen zeker vast ende ghestade sullen ghehouden bliuen so hebben wiit ghezeghelt met onsen propren zeghelen huutanghende . dit was ghedaen int iaer ons heren als men screef siin incaernatioen dusentich drie + ondert ende viue ende dartich tsaterdaghes voer sinte bauen dach