Corpus Van Reenen-Mulder (CRM14): Oorkonde H536r33505

het si cont allen den ghonen die nu sijn ende die na ons sullen sijn / dat der jan van dronghene prochipape van den wijngaerde in brugghe dede copen broedre woutren van orscamp meest_ van den beggaerden ende broedre symoene toluine te ser jans bouf vors_ / viere / ende twintich ymete lands ende husinghe daer mede in die prochie van orscamp o_me seuentiene pond grote van sinen p_pren goede / twelke land broeder woutre / ende broeder symoen vors_ si ontfinghen te ser jans bouf van den wijngaerde in maniere_ ende in conditien / dat si den here janne vors_ jaerlix souden gheuen / also langhe / als hi leuede / van elken ymete ene maelge van florente te sinte baues messe / of die waerde / ende quame den vorseiden heer janne hier of cost of scade / o_me tghebrec van den ghelde / daer of belouen wi / als kerstine liede den here janne te voldoene cost / ende scade / te sinen simplen segghene / vort na ser jans doot so es gheordinert biden here janne vors_ / ende bi sinen executeurs den here michiele prochipape van onser vrouwen / ende bi den here janne den waerd prochipape van sinte katelinen / ende broedre woutren van orscamp / meest_ van den beggaerden / ende bi broedre symoene toluine / en bi haren vogheden / den here willemme van der stoue / ende bi den here heinrike martine / ende biden broedren ghemeenlike / dat me die viere ende + twintich maelien / die comen van den vors_ lande / ende zesse maelien jaerlix / die hi daer toe heeft ghegheue_ dat men dit vors_ ghelt daghelichs soude gheuen een partseel den pape te siere noot / die seide die eerste messe ten beggaerden / dats te verstane enen groten tornoysen / dat hi daer vp soude hebben / sine lijfthucht / ende sine noot / ende desen vors_ groten te deelne eruelike / bi den goeden lieden van den beggaerden / den ghone_ die hem seide dese erste messe / te haerre tijt ouer den here janne vors_ ouer sijns vader siele / ende ouer siere moeder / ouer sinen sustren / ende ouer sinen broedren / ende dese eerste messe o_me gode / ende siere moeder ende in die eere van sinte janne baptisten / ende o_me~dat die here jan allen dese dinghen heeft ghedaen o_me goede / ende omme die ruste van den beggaerden so belouen wi als kerstine liede ouer hem te biddene / ende maken deelachtich an alle onse weldaet / ende sine weldaet maect hi ghemeene met ons / vort belouen wi alse goede kerstine liede / na sijn lijf te houdene dese ordinante / van der eerster messe / also langhe als wi sullen leuen / ende doen belouen te houdene / den ghenen / die na ons sullen comen / et desen vors_ ghelde elkes daghes te doene die eerste messe specialike ouer hem / ende ouer die sine / ende dit ghelt van desen messen / niet te mindenre no niet te meersene met andren parthelen van buten / maer ouer hem / ende ouer die sine specialike / ende ouer niement el te segghene dese erste messe / vort ware die messe niet ghedaen / bi den ghebrecke van den beggaerden / of bi fauten van den pape / so wille der jan van den wijngarde vors_ / dat die beggaerde gheuen desen groten dene helt den lasersen / ende dander helt den arme_ huusweeken / in die prochie van onser vrouwen / ende van elken messe die men daghelichs niene seide / dat men daer ouer deele den groten tornoysen aldiere ghelike / ende dat belouen wi alle ghemeenlike alse goede kerstine liede te houdene / ende te doene dese ordinante / vort dat husekin datten beggaerden staet alre~naest / dat wilen was marien vants / ende haers mans / dat heeft ghegheuen broedre woutre meest_ van den beggaerden / ende alle die broedre van den huus ghemeenlike den here janne vors_ sonder jaerliken chens metten lande / daert up staet / dat gaet tote haren muere / die staet bachten haren reeftre / o_me twe pond groter tornoyse / te sinen liue / die hi wel heeft betaelt / vort maecte die vors_ here jan enighe dinghen / om dit vors_ huus / dat wildi dat na sijn lijf bleue den beggaerden / o_me die mi_ne van gode / ende si met hem souden bidden / maer also langhe als hi leuet / wille hi metten huus doon sinen wille . vort sijn huus / dat staet in den ghent~wech / dat hi cochte jeghen hannin haren boud_e / dat wilen was jans van male / daer an sijn zeuen woninghen / dat heeft hi vp~ghedreghen den begghaerden na sijn lijf / o_me~dat si dat goeden armen lieden sullen leenen jaerlix in te woenne / o_me die mi_ne van gode / maer dat men daer of sal trecken den land~chens / ende daer niet mede hout staende / ende als al wordt te~vallen / dat ment vercope ende deele / o_me gode / ende / o_me~dat alle dese dinghen sullen bliuen goet / vast / zeker / ende ghestade / so hebbic here jan vors_ ghebeden minen executeurs / den here michiele prochipape van onser vrouwen / den here janne den waerd prochipape van sinte katelinen / broeder woutren van orscamp meest_ van den beggarden / broeder symoene toluine / ende alle den andren beggarden die zeghele hebben / dat se dit kennen belouen / ende zeghelen / biden rade van den here willemme van der stoue / biden here heinrike martine / die dit hebben gheconsentert / ende met haren p_pren zeghelen vthanghende ghezeghelt . ende jc here jan vors_ confirmere / ende make vast alle dese vorseide dinghen met minen p_pren zeghele . dit was ghedaen int jaer ons heren als men screef dusentich drie + hondert viue ende dartich sdonresdaghes na sinte martins dach .